3/28/2024
Today from Hiiraan Online:  _
Wararka Maanta- Khamiis, May 3 , 2012
Hay'adaha HARO iyo WAMY oo Gargaar isugu jirtay Dhar, Raashin iyo Caano-boore ugu qaybiyay Muqdisho Qoysas Barakacayaal (SAWIRRO)


Khamiis, May 03, 2012 (HOL) — Hay'adaha samofalka ee HARO iyo WAMY ayaa ugu qaybiyay maanta oo Khamiis ah ugu qaybiyay Muqdihso 450-qoys oo barakacayaal ah gargaar isugu jiray dhar, raashin iyo caano-boore.

Gargaarkan oo bixintiisa ay iska kaashadeen labada hay'adood ayaa waxaa aad u soo dhaweeyay qoysaskii loo qaybiyay, waxaana goobta lagu bixiyay oo ku taallay degmada Wadajir ku sugnaa guddoomiyaha hay'adda HARO Cali Xaaji Sheekh C/nuur iyo mas'uuliyiinta hay'adda kale ee WAMY.

Qoysaskii deeqdan ka faa'iideystay ayaa aad u soo dhaweeyay iyagoo sheegay in lagu soo beegay xilli ay baahi weyn u qabeen, waxayna ku jiray dadkii deeqdan ka faa'iideystay kuwo curyaamiin ah iyo dad waayeel ah.

Mas'uuliyiinta hay'adaha deeqda bixiyay ayaa waxay sheegeen in dharka uu ahaa mid ka yimid dalka dibaddiisa, raashinkana uu ahaa mid horay u yaallay Muqdisho ayna u qaybiyeen dadkii ugu liitay ee ay soo xuleen.


"Waan uga mahadcelinayaa hay'adaha deeqdan nasoo gaarsiiyay. Waxaa lagu soo beegay xilli aan baahi weyn u qabnay," ayuu yiri oday ay ka go'an tahay gacanta midig oo ka mid ahaa dadkii deeqdan ka faa'iideystay.

Dadkii deeqahan loo qaybiyay ayaa waxaa qoys walba la siiyay xirmo dhar ah oo ka kooban illaa toban shay, 50-kg oo bariis ah iyo welib laba gasac oo caano boore ah kuwaasoo ay ku jireen 1,800-kg oo caano marka la isku geeyo.

Ma ahan markii ugu horreysay oo hay'adahan ay gargaar noocan oo kale ah ugu qaybiyaan Muqdisho qoysas dhibaateysan, waxaase ay horay dhowr jeer u bixiyeen gargaarro isugu jiray, raashin iyo dhar.

Dhanka kale, hay'adda HARO ayaa waxay tababar socday laba casho ugu qabatay Muqdisho ardayda dugsiyada sare ee gobolka Banaadir qaarkood, kuwaasoo ay bartay gargaarka deg-degga ah, waxanaa tababarkaas ka faa'iideystay lixdan arday.






Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
5/3/2012 12:42 PM EST
Khamiis, May 03, 2012(HOL): Xaflad si aad u heer sarraysa loo soo agaasimay laguna soo dhawaynayey Cayaaryahanaddii weyneyd ee kooxda Muqdisho, iyo Xulka Qranka K/Kolayga soomaaliyeed Luul Cusmaan Sabriye ayaa lagu qabtay Magaalada Stockholm ee caasimadda dalka Sweden.

5/3/2012 9:29 AM EST
Khamiis, May 03, 2012 (HOL) — Wasiirka arrimaha gudaha iyo ammaanka Qaranka DKMG ah ee Soomaaliya, C/samad Macallin Maxamuud ayaa maanta si rasmi ah xariga uga jaray barnaamijka xasilinta Muqdisho oo ay iska kaashanayaan hay’adda Mareykanka u qaabilsan horumarinta caalamiga (USAID) iyo hay’adda Ingiriiska (UK) u qaabilsan horumarinta dibadda (DFID), iyadoo barnaamijkan lagu taageerayo $9.5 malyuun oo ah deeq ka timid dowladaha Mareykanka iyo UK.

5/3/2012 9:16 AM EST
Khamiis, May 03, 2012 (HOL) — Ra’iisul wasaaraha Soomaaliya, Cabdiweli Maxamed Cali ayaa maanta kulan la qaatay qeybaha kala duwan ee bulshadda Soomaliyeed; sida ururada, xubno ka tirsan culumaa’udiinka Ahlusunna iyo dhalinyaradda.

5/3/2012 8:42 AM EST
Khamiis, May 03, 2012 (HOL) — Guddidda Diiwaangelinta ururadda Siyaasadda iyo ansixinta axsaabta Somaliland, ayaa sheegay sagaalka urur ee qiimeynta ku hadhay in aanay buuxin shuruudihii laga rabay,isla markaana ay ka xun yihiin eeddaha ay usoo jeediyeen ururadaasi hadhay.

5/3/2012 8:39 AM EST
Khamiis, May 03, 2012 (HOL) — Xukuumadda Soomaaliya ayaa waxay waddaa qorshe ay isugu diyaarinayso inay xukunka ku wareejiso dowlad lasoo doortay marka la gaaro bisha Ogoosto ee sannadkan, markaasoo ay dhammaanayso xilliga dowladda KMG ah ay shaqeynayso.

5/3/2012 8:01 AM EST
Khamiis, May 03, 2012 (HOL) — Kulankan oo lagu qabtay hotel Saxafi ee Muqdisho ayaa waxaa kasoo qaybgalay waxgarad, suldaanno, dhallinyaro isugu jiray gabdho iyo wiilal iyo dad waayeel ah, waxaana looga hadlayay xoojinta nabadda iyo sidii ay Soomaaliya ku heli lahayd nabad.

5/3/2012 7:18 AM EST
Khamiis, May 03, 2012 (HOL) — Maalinta xoriyatul qawlka aduunka ayaa si weyn loogu xusay magaaladda Hargeysa ee Somaliland, kaas oo ay ka soo qaybgaleen suxufiyiinta ka hawlgalla magaaladda Hargeysa iyo masuuliyiin ka tirsan xukuumadda iyo xisbiga muxaafadka ah ee KULMIYE.

5/3/2012 7:16 AM EST
Khamiis, May 03, 2012 (HOL) — Ciidamada dowladda KMG ah ee Soomaaliya ayaa maanta is-hortaag ku sameysay shir ay Muqdihso ku yeelan lahaayeen siyaasiyiin iyo xildhibaanno kasoo horjeeda dowladda KMG ah, kuwaasoo uu ku jiray Sheekh Yuusuf Maxamed Siyaad (Indha-cadde).

5/3/2012 1:46 AM EST
Khamiis, May 03, 2012 (HOL) — Dowladda KMG ah ee Soomaaliya ayaa sheegtay in aan Muqdisho lagu qaban karin shirar aan lagu soo wargelin wasaaradda arrimaha gudaha iyo ammaanka Qaranka ee dowladda KMG ah.

5/3/2012 1:38 AM EST
Khamiis, May 03, 2012 (HOL) — Kooxo hubeysan ayaa xalay ku toogtay xaafadda garsoor ee waqooyiga degmada Gaalkacyo ee gobolka Mudug suxufi u shaqeynayay idaacadda Daljir oo lagu magacaabi jiray, Farxaan Jeemis Cabdulle xilli uu ka tagay goobtiisa shaqo uuna kusii socday gurigiisa.

5/3/2012 1:29 AM EST
Khamiis, May 03, 2012 (HOL) — Xoogagga Xarakada Al-shabaab ayaa la wareegay gacan ku haynta deegaanka Goobo oo ka tirsan degmada Maxaas ee gobolka Hiiraan gallinkii dambe ee shalay kaddib dagaal muddo kooban socday oo tuuladaas ku dhexmaray xoogagga Al-shabaab iyo kuwa Ahlusunna oo halkaas ku sugnaa.