3/19/2024
Today from Hiiraan Online:  _
Wararka Maanta- Arbaco, Dec 5 , 2012
Madaxweynaha Soomaaliya iyo Wafdigii uu Hoggaaminayay oo si wanaagsan loogu soo dhaweeyay Turkiga (SAWIRRO)

Arbaco, December 05, 2012 (HOL) —Madaxweynaha Soomaaliya iyo wafdigii uu hoggaaminayay ayaa si diiran loogu soo dhaweeyay dalka Turkiga, isagoo maanta kulan looga hadlay xoojinta xiriirka labada dal iyo iskaashi dhexmara la yeeshay madaxweynaha dalkaas Cabdalla Gull.

Wafdiga Madaxweynaha ayaa markii uu ka degay garoonka diyaaradaha ee magaalada Ankara waxaa kusoo dhaweeyay madax katirsan dowladda Turkiga, masuuliyiin ka socday safaaradda Soomaalida ee dalkaas, arday iyo dadweyne Soomaaliyeed oo dalkaas ku nool.

Madaxweeynaha ayaa la filayaa in berri oo Khamiis ah uu la kulmo ra'iisul wasaaraha Turkiga, Reccep Tayyip Erdogan isagoo kala hadli doona xiriirka Soomaaliya iyo sidii ay dowladda Turkiga u sii wadi lahayd mashaariic horumarineed oo ay sannadkii hore ay ka billaabeen Soomaaliya.

Sidoo kale, madaxweynaha Soomaaliya ayaa lagu wadaa inuu la kulmo ardayda Soomaaliyeed ee dalkaas u jooga waxbarashada iyo Soomaalida kale ee dalkaas ku nool. isagoo saddex casho kaddib dib gu soo laaban doona magaalada Muqdisho.

Booqashadan ayaa noqonaysa tii ugu horreysay ee madaxweynaha Soomaaliya, Xasan Sheekh Maxamuud uu ku tago dalka ku yaalla qaaradda Yurub tan iyo markii xilka madaxweynenimo loo doortay bishii September ee sannadkan isagoo tartanka doorashada kaga guuleystay madaxweynihii hore ee Soomaaliya, Shariif Sheekh oo hadda ku nool dalka Uganda.

Haddaba daawo Sawirrada sidii Madaxweynaha Soomaaliya loogu soo dhaweeyay Turkiga:






Maxamed Xaaji Xuseen, Hiiraan Online
[email protected]

Muqdisho, Soomaaliya











Click here
12/5/2012 8:44 AM EST
Arbaco, December 05, 2012 (HOL) — Qaar ka mid ah madaxda Dowladda federaalka Soomaaliya iyo masuuliyiin ka kala socotay bahda waxbarashada iyo hay’adda waddaniga ah ee Saacid ayaa maanta ka qayb-galay xaflad lagu dib loogu furayay dugsiga hoose iyo dhexe Saacid/Dhagax-tuur ee magaalada Muqdisho.

12/5/2012 8:28 AM EST
Arbaco, December 05, 2012 (HOL) — Kulankan oo ahaa mid ay albaabbadu u xiran yihiin ayna ka qaybgaleen guddoomiyaha baarlamaanka ahna ku simaha madaxweynaha Soomaaliya, Prof. Maxamed Cismaan Jawaari iyo ra'iisul wasaare Cabdi Faarax Shirdoon (Saacid) ayaa ka dhacay xarunta madaxtooyada Muqdisho.

12/5/2012 8:25 AM EST
Arbaco, December 05, 2012 (HOL) — Madaxweynaha Soomaaliya, Xasan Sheekh Maxamuud oo booqasho ku jooga dlaka Turkiga ayaa maanta kulan kula yeeshay magaalada Ankara dhiiggiisa dalkaas, Cabdalla Gull iyagoo kawada hadlay adkeynta xiriirka u dhexeeya labada dal iyo arrimo kale.

12/5/2012 8:24 AM EST
Arbaco, December 05, 2012 (HOL) — Gudoomiyaha Isbaheysiga nabadda, C/llaahi Sheekh Xasan oo maanta shir jaraaid ku qabtay Muqdisho ayaa dhaliilo kala duwan u jeediyay madaxda dowladda cusub ee Soomaaliya, isagoo dhinac kalena talooyin u soo jeediyay.

12/5/2012 7:00 AM EST
Arbaco, December 05, 2012 (HOL) — Wasiirka ammaanka Puntland, Col. Khaliif Ciise Mudan oo shir jaraa'id ku qabtay magaalada Boosaaso ayaa ka hadlay dagaal ciidamada Puntland iyo kuwa Al-shabaab ku dhexmaray deegaanka Sugurre ee duleedka Boosaaso.

12/5/2012 2:12 AM EST
Arbaco, December 05, 2012 (HOL) — Shirkad lagu magacaabo Horn of Africa Airline ayaa ka billowday Muqdisho duulimaadyo joogto ah oo ay ku tagayso degmooyinka Kismaayo, Baydhabo iyo Baladweyne oo ay ku sugan yihiin ciidmada dowladda iyo kuwa AMISOM, iyadoo duulimaadyadan ay soo dhaweysay AMISOM.

12/5/2012 1:43 AM EST
Arbaco, December 05, 2012 (HOL) — Ugu yaraan 11 askari oo labada dhinac ah ayaa ku dhintay dagaal deegaanka Sugurre ee gobolka Bari xalay saqdii dhexe ku dhexmaray ciidamada Putland iyo xoogagga Al-shabaab ee Buuraleyda Gollis iyo qarax lala beegsaday gaari ay wateen ciidamada Puntland.

12/5/2012 1:29 AM EST
Arbaco, December 05, 2012 (HOL) — Ugu yaraan shan qof oo shacab ah ayaa ku dhaawacmay madaafiic xalay ku dhacay degmooyinka Boondheer iyo Wardhiigley oo ku dhow madaxtooyada Soomaaliya, iyadoo Al-shabaab ay sheegtay inay xalay weerar hoobiyeyaal ah ku qaaday madaxtooyada Soomaaliya.

12/5/2012 1:27 AM EST
Arbaco, December 05, 2012 (HOL) — Ugu yaraan toban ruux ayaa ku dhintay tiro intaas ka badanna way ku dhaawacmeen dagaal culus oo ciidamada dowladda iyo xoogagga Al-shabaab ku dhexmaray shalay gallinkii dambe deegaan u dhexeeya degmooyinka Baydhabo iyo Qasaxdheere ee gobolka Bay.