3/19/2024
Today from Hiiraan Online:  _
Wararka Maanta- Arbaco, Dec 5 , 2012
Madaafiic khasaare geystay oo xalay ku dhacay Degmooyinka Wardhiigley iyo Boondheere ee Gobolka Banaadir

Arbaco, December 05, 2012 (HOL) — Ugu yaraan shan qof oo shacab ah ayaa ku dhaawacmay madaafiic xalay ku dhacay degmooyinka Boondheer iyo Wardhiigley oo ku dhow madaxtooyada Soomaaliya, iyadoo Al-shabaab ay sheegtay inay xalay weerar hoobiyeyaal ah ku qaaday madaxtooyada Soomaaliya.

Duqeymahan ayaa dhacay xalay saqdii dhexe xilli dadku ay hurdayeen, iyadoo laga maqlay magaalada inteeda badan hugunka madaafiicda, mana jiraan warar kasoo baxay dhinaca dowladda Soomaailya oo ku saabsan duqeymahan.

"Shan qof hal qoys kasoo jeeda ayaa ku dhaawacmay degamda Boondheere, kaddib markii hoobiyeyaal ay ku dhaceen gurigii ay ku noolaayeen, qaarkood xaaladdooda waa mi daran," ayuu yiri goobjooge ku sugan degmada Boondheer oo magaciisa ku soo koobay Cali Nuur.

Madaafiicda xalay ku dhacday degmooyinkan ka tirsan gobolka Banaadir ayaa waxay tiradoodu ahayd shan, waxaana ay imaanayaa xilli ay hay'adaha ammaanku ka wadeen Muqdisho maalmihii lasoo dhaafay howlgallo lagu adkeynaya ammaanka.

Bar Internet oo taageerta Al-shabaab ayaa lagu daabacay in xalay illaa toddoba madfac ay ku weerartay Al-shabaab xarunta madaxtooyada, qaarkoodna ay gudaha u galeen xarunta, inkastoo aysan sheegin khasaare ay dhaliyeen.

Duqeyntan ayaa waxay imaanaysaa xilli ay Al-shabaab sheegtay inay xoojinayso howgallada ay kawaddo magaalada Muqdisho ee ay uga soo horjeeddo dowladda, xilli ay bartamihii sannadkii hore isaga baxeen degmooyinka gobolka, balse waxay inta badan sheegaan inay weli xubno u joogaan Muqdisho.

Waa markii ugu horreysay tan iyo markii lasoo doortay madaxda dowaldda cusub ee Soomaaliy oo duqeymo caynkan oo kale ah lala beegsado xarunta madaxtooyada, iyadoo la xusuusto in intii uu xilka hayay madaxweynihii hore dhowr jeer duqeymo lala eegtay madaxtooyada, kuwaasoo qaarkood ku dhacay kaamam ay ku jireen dad barakacayaal, kuwaasoo ay gaareen khasaare isugu jira dhimasho iyo dhaawac.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
12/5/2012 8:44 AM EST
Arbaco, December 05, 2012 (HOL) — Qaar ka mid ah madaxda Dowladda federaalka Soomaaliya iyo masuuliyiin ka kala socotay bahda waxbarashada iyo hay’adda waddaniga ah ee Saacid ayaa maanta ka qayb-galay xaflad lagu dib loogu furayay dugsiga hoose iyo dhexe Saacid/Dhagax-tuur ee magaalada Muqdisho.

12/5/2012 8:28 AM EST
Arbaco, December 05, 2012 (HOL) — Kulankan oo ahaa mid ay albaabbadu u xiran yihiin ayna ka qaybgaleen guddoomiyaha baarlamaanka ahna ku simaha madaxweynaha Soomaaliya, Prof. Maxamed Cismaan Jawaari iyo ra'iisul wasaare Cabdi Faarax Shirdoon (Saacid) ayaa ka dhacay xarunta madaxtooyada Muqdisho.

12/5/2012 8:25 AM EST
Arbaco, December 05, 2012 (HOL) — Madaxweynaha Soomaaliya, Xasan Sheekh Maxamuud oo booqasho ku jooga dlaka Turkiga ayaa maanta kulan kula yeeshay magaalada Ankara dhiiggiisa dalkaas, Cabdalla Gull iyagoo kawada hadlay adkeynta xiriirka u dhexeeya labada dal iyo arrimo kale.

12/5/2012 8:24 AM EST
Arbaco, December 05, 2012 (HOL) — Gudoomiyaha Isbaheysiga nabadda, C/llaahi Sheekh Xasan oo maanta shir jaraaid ku qabtay Muqdisho ayaa dhaliilo kala duwan u jeediyay madaxda dowladda cusub ee Soomaaliya, isagoo dhinac kalena talooyin u soo jeediyay.

12/5/2012 7:00 AM EST
Arbaco, December 05, 2012 (HOL) — Wasiirka ammaanka Puntland, Col. Khaliif Ciise Mudan oo shir jaraa'id ku qabtay magaalada Boosaaso ayaa ka hadlay dagaal ciidamada Puntland iyo kuwa Al-shabaab ku dhexmaray deegaanka Sugurre ee duleedka Boosaaso.

12/5/2012 3:23 AM EST
Arbaco, December 05, 2012 (HOL) —Madaxweynaha Soomaaliya iyo wafdigii uu hoggaaminayay ayaa si diiran loogu soo dhaweeyay dalka Turkiga, iyadoo lagu wado inay maanta kulammo la billaabaan madaxda dalkaas oo uu ugu horreeyo madaxweynaha Turkiga Cabdalla Gull.

12/5/2012 2:12 AM EST
Arbaco, December 05, 2012 (HOL) — Shirkad lagu magacaabo Horn of Africa Airline ayaa ka billowday Muqdisho duulimaadyo joogto ah oo ay ku tagayso degmooyinka Kismaayo, Baydhabo iyo Baladweyne oo ay ku sugan yihiin ciidmada dowladda iyo kuwa AMISOM, iyadoo duulimaadyadan ay soo dhaweysay AMISOM.

12/5/2012 1:43 AM EST
Arbaco, December 05, 2012 (HOL) — Ugu yaraan 11 askari oo labada dhinac ah ayaa ku dhintay dagaal deegaanka Sugurre ee gobolka Bari xalay saqdii dhexe ku dhexmaray ciidamada Putland iyo xoogagga Al-shabaab ee Buuraleyda Gollis iyo qarax lala beegsaday gaari ay wateen ciidamada Puntland.

12/5/2012 1:27 AM EST
Arbaco, December 05, 2012 (HOL) — Ugu yaraan toban ruux ayaa ku dhintay tiro intaas ka badanna way ku dhaawacmeen dagaal culus oo ciidamada dowladda iyo xoogagga Al-shabaab ku dhexmaray shalay gallinkii dambe deegaan u dhexeeya degmooyinka Baydhabo iyo Qasaxdheere ee gobolka Bay.