2014-08-22
Today from Hiiraan Online:  _
Wararka Maanta- Khamiis, Dec 13, 2012
Madaxweynaha Somalia oo sheegay inaysan Wadahadal la galayn Xarakada Al-shabaab inta ay Hubka wataan


Khamiis, December 13, 2012 (HOL) — Madaxweynaha Soomaaliya, Xasan Sheekh Maxamuud ayaa sheegay inaysan wax wadahadal ah la galayn Al-shabaab iyo Al-Qaacida inta ay hubka wataan, balse ciddii ka tanaasusha fikirkooda ayuu sheegay inay soo dhaweynayaan oo ay labada gacmood ku qaadayaan.

Madaxweynaha oo wareysi siinayay BBC-da laanta afka Soomaaliga ayaa sidoo kale ka hadlay wadahadalladii u dhexeeyay dowladda Soomaaliya iyo Somaliland, isagoo sheegay in wadahadalladaas ay sii socon doonaan; uuna rajeynsayo inay miro-dhal noqdaan wadahadalladaas.

"Dagaalyahannada shisheeye ee Al-shabab ka mid ah ama Al-Qaacida ka tirsan ee Soomaaliya) ku sugan wax wadahadal ah nagama dhexeeyaan waxa naga dhexeysa oo keliya inay dalkeenna nooga baxaan. Dhallinyarada Soomaalida ah ee ka mid ah Al-shabaab haddii ay hubka dhigaan waan soo dhaweynaynaa, balse inta ay hubka wataan oo ay aamisan yihiin dalkan dunida ayuu ka dhexeeyaa iyo inay wax dilaan ama qarxiyaan waan iska dhicinaynaa," ayuu yiri Xasan Sheekh.

Madaxweynuhu wuxuu sidoo kale ka hadlay daqliga dowladda ay ku shaqeyso halka uu kasoo galo, isagoo sheegay in dowladdu ay illaa iyo hadda ku shaqeynayso daqliga kasoo xarooda dekedda iyo garoonka diyaaradaha, ayna wadaan dadaallo kale oo ay ku horumarinayaan daqliga dowladda soo gala.

"Dowladdu illaa hadda waxay ku tiirsan tahay daqliga kasoo gala dekedda iyo garoonka diyaaradaha Muqdisho, sidoo kale waxaan wadnaa qorshe aan ku horumarinayno daqliga gudaha laga helo sida canshuuraha. Waxaase jira inay dad Soomaaliyeed oo dibadaha ku nool ay lacago kusoo taageeraan dowladda kuwaasoo kusoo shuba bankiga dhexe," ayuu yiri Xasan Sheekh.

Sidoo kale, madaxweynuhu wuxuu ka hadlay wadahadalladii u dhexeeyay dowladda Soomaaliya iyo Somailand, isagoo xusay inay u hakadeen doorashooyinkii ka dhacay Muqdisho ee lagu soo doortay iyaga iyo doorashooyinkii golayaasha deegaanka ee Somaliland ka dhacay.

"Wadahadalladu waa sii socon doonaan, laakiin duruufo ayaa hakiyay, waayo waxaa la galay in xilliga KMG ah laga baxo, sidoo kale Somaliland waxaa ka dhacayay doorashooyin, waxaana rajeynayaan in wadahadalladu ay noqdaan kuwo miro-dhal ah," ayuu yiri madaxweynaha Soomaaliya.

Ugu dambeyn, madaxweynaha Soomaaliya wuxuu iska fogeeyay in dowladdiisa ay ku koobtay xukuumadda xubnihii xisbigiisa ka tirsanaa oo inta kale uu iska riixay, isagoo xusay inay jiraan dad xubnihii uu isagu la tartamay u ololeynayay ay ka mid yihiin xukuumadiisa.

"Dowladdu ma ahan mid xisbi gaar ah ku xiran, waa mid u dhexeysa Soomaalida oo dhan, waa mid u dhexeysa beelaha Soomaalida oo dhan. Dadka hadalladan faafiyay waa kuwo qas-wadayaal ah oo aan doonayn dowladnimada Soomaaliya inay noqoto mid hirgasha," ayuu madaxweynuhu ku yiri wareysigiisa.

Madaxweynaha Soomaaliya oo xilka loo doortay bishii Septmber ee sannadkan ayaa wuxuu dadaal ugu jiraan in Soomaaliya uu ka saari lahaa dhibaatooyinkii ay kusoo jirtay labaatankii sano ee colaaduhu ay jireen.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2012-12-13 8:50 AM EST
Khamiis, December 13, 2012 (HOL) — Kulan looga hadlay ammaanka iyo horumarinta gobolka Hiiraan oo uu ka qaybgalay ugaaska beesha Xawaadle, ugaas C/raxmaan Ugaas Khaliif Ugaas Rooble ayaa maanta lagu qabtay hoteelka Ambassador ee magaalada Muqdisho.

2012-12-13 8:41 AM EST
Khamiis, December 13, 2012(HOL): Xuska 40 guurada far-soomaaliga ayaa lagu qaban doonaa magaalada Jabuuti ee dalka Jamhuuriyadda Jabuuti 17ka ilaa 22ka bishan Disambar ee 2012ka. Xuskan, oo noqon doona mid ballaadhan, waxa lagu martiqaaday madaxda Soomalida ee geeska Afrika.

2012-12-13 8:31 AM EST
Khamiis, December 13, 2012 (HOL) — Afhayeenka ururka raaskambooni, Cabdinaasir Seeraar Maax ayaa sheegay in ammaanka magaalada Kismaayo ee xarunta gobolka Jubbada Hoose uu yahay mid ka wanaagsan sidii hore, isagoo xusay in dadkii horay uga barakacay magaaladaas ay dib ugu soo laabanayaan.

2012-12-13 8:12 AM EST
Khamiis, December 13, 2012 (HOL) — Guddomiyaha Urursiyaasadeedka Rays Mr; Xasan Maxmed Cali (Gaafaadhi), ayaa sheegay in aanu ku qanacsanayn Natiijada ay soo saareen guddida doorashooyinku, maadaama oo wax isdaba marin iyo musuqmaasuq badani uu hadheeyey, waxaanu ugu baaqay komishanka inay is casilaan mar haddii ay masuuliyadii ummadda u hayeen ka soo bixi waayeen.

2012-12-13 7:45 AM EST
Khamiis, December 13, 2012 (HOL) — Madaxweynaha Soomaaliya, Xasan Sheekh Maxamuud ayaa maanta oo Khamiis ah xarunta madaxtooyada Soomaaliya kulan albaabbadu u xiran yihiin kula qaatay, guddoomiyaha baarlamaanka dalka Jabuuti, Idiris Aarnauut Cali oo booqasho ku jooga Muqdisho.

2012-12-13 7:10 AM EST
Khamiis, December 13, 2012 (HOL) — Ra'iisul wasaaraha Soomaaliya, Cabdi Faarax Shirdoon (Saacid) ayaa maanta dhameystiray xubnaha golaha wasiirrada xukuumadda Soomaaliya, isagoo magacaabay shan wasiir u dowle iyo 20-wasiir ku xigeen.

2012-12-13 5:41 AM EST
Khamiis, December 13, 2012 (HOL) — Mukhtaar Xassan Maxamed oo 27-bishii November ee ina dhaaftay loosoo xiray ama loo qabtay dilka guddoomiyihii gollaha odayaasha dhaqanka gobollka Hiiraan Max’ed Shiikh Xusseen Maryacade ayaa qirty in uu galay danbiga loo soo xiray oo ah in uu ahaa shaqsigii gacantiisa ku toogtay guddoomiyaha.

2012-12-13 1:25 AM EST
Khamiis, December 13, 2012 (HOL) — Abaanduulaha ciidamada xoogga Soomaaliya, Jen. C/kariin Yuusuf Aadan (Dhego-badan) ayaa sheegay inay ka go'an tahay inay isku furaan dhammaan gobollada Soomaaliya, kaddib markii isaga iyo saraakiil kale ay saxaafadda kula hadleen degmada Jowhar.

2012-12-13 1:04 AM EST
Khamiis, December 13, 2012 (HOL) — 24-kii saac ee lasoo dhaafay waxaa xeebta degmada Garacad ee gobolka Mudug ka dhacay dagaallo khasaare dhaliyey oo dhex maray ciidamada badda ee Puntland iyo kooxo burcad-badeed ah.