3/28/2024
Today from Hiiraan Online:  _
Wararka Maanta- Khamiis, Dec 13, 2012
Iska-horimaad Xeebaha Degmada Garacad ku dhex-maray Ciidamada Badda Puntland iyo Kooxo burcad-badeed ah


Khamiis, December 13, 2012 (HOL) — 24-kii saac ee lasoo dhaafay waxaa xeebta degmada Garacad ee gobolka Mudug ka dhacay dagaallo khasaare dhaliyey oo dhex maray ciidamada badda ee Puntland iyo kooxo burcad-badeed ah.

Ugu yaraan hal askari oo ciidamada badda ka tirsan iyo saddex nin oo burcad-badeed ah ayaa la xaqiijiyey inay geeriyoodeen, sidoo kale waxay dhaawacyo kala duwani soo gaareen lix qof oo ka kala tirsanaa labada dhinac.

Iska hor imaadka ayaa bilowday kadib markii ciidamada badda ee uu fadhigoodu yahay degmada Eyl ay weerar qorsheysan kusoo qaadeen koox burcad ah oo muddo saddex sano ku dhow xeebaha degmada Garacad ku haystey markab laga leeyahay dalka Imaaraatka Carabta.

Ciidamadan oo ay kaabayaan diyaaradaha qummaatiga u kaca iyo gaadiidka dagaalka ayaa dhowr mar oo ay isku dayeen in ay markabka xoog kula wareegaan ku guuleysan waayey, waxayna xiligan dhinaca badda iyo berrigaba ka go'doomiyeen goobta markabka - oo MV ICEBERG-1 lagu magacaabo- uu ku sugan yahay.

MV ICEBERG-1 oo uu ka dul babanayo calanka dalka Panama, islamarkaana laga leeyahay dalka Imaaraadka Carabta, waxaa la afduubtay March 2010, waxaana saaran 22 badmaax oo u kala dhashay dalalka: Sudan, Yemen, Ghana, Pakistan, Philippines iyo India.

Burcadda markabka MV ICEBERG-1 uu gacanta ugu jiro ayaa dalbaday lacag madax furasho ah oo gaareysa 5 ilaa 8 milyan oo Dollar, inkasta oo ay shirkadda iska lihi ka madax adagtay in ay lacagta intaas le'eg bixiso. Waxaana xusid mudan in kooxda markabkan haystaa ay dileen kabtankiisii oo ay dhalashadiisu Yemeni ahayd, laguna magacaabi jirey Cabdirasaaq Cali Saalax.

Dhacdadan ayaa kusoo aadeysa xilli sanadkan sii dhamaanaya ee 2012 ay si aad ah hoos ugu dheceen weeraradii ay gaadiidka maraya badaha caalamiga ah ku qaadi jireen kooxaha burcad-badeedda Soomaalidu, haseyeeshee waxaa weli gacantooda ku jira tobanaan markab iyo badmaaxiin boqolaal gaaraya.

Maxamed Salaad Xaaji Dirir, Hiiraan Online
[email protected]
Puntland, Soomaaliya













Click here
12/13/2012 8:50 AM EST
Khamiis, December 13, 2012 (HOL) — Kulan looga hadlay ammaanka iyo horumarinta gobolka Hiiraan oo uu ka qaybgalay ugaaska beesha Xawaadle, ugaas C/raxmaan Ugaas Khaliif Ugaas Rooble ayaa maanta lagu qabtay hoteelka Ambassador ee magaalada Muqdisho.

12/13/2012 8:41 AM EST
Khamiis, December 13, 2012(HOL): Xuska 40 guurada far-soomaaliga ayaa lagu qaban doonaa magaalada Jabuuti ee dalka Jamhuuriyadda Jabuuti 17ka ilaa 22ka bishan Disambar ee 2012ka. Xuskan, oo noqon doona mid ballaadhan, waxa lagu martiqaaday madaxda Soomalida ee geeska Afrika.

12/13/2012 8:31 AM EST
Khamiis, December 13, 2012 (HOL) — Afhayeenka ururka raaskambooni, Cabdinaasir Seeraar Maax ayaa sheegay in ammaanka magaalada Kismaayo ee xarunta gobolka Jubbada Hoose uu yahay mid ka wanaagsan sidii hore, isagoo xusay in dadkii horay uga barakacay magaaladaas ay dib ugu soo laabanayaan.

12/13/2012 8:12 AM EST
Khamiis, December 13, 2012 (HOL) — Guddomiyaha Urursiyaasadeedka Rays Mr; Xasan Maxmed Cali (Gaafaadhi), ayaa sheegay in aanu ku qanacsanayn Natiijada ay soo saareen guddida doorashooyinku, maadaama oo wax isdaba marin iyo musuqmaasuq badani uu hadheeyey, waxaanu ugu baaqay komishanka inay is casilaan mar haddii ay masuuliyadii ummadda u hayeen ka soo bixi waayeen.

12/13/2012 7:45 AM EST
Khamiis, December 13, 2012 (HOL) — Madaxweynaha Soomaaliya, Xasan Sheekh Maxamuud ayaa maanta oo Khamiis ah xarunta madaxtooyada Soomaaliya kulan albaabbadu u xiran yihiin kula qaatay, guddoomiyaha baarlamaanka dalka Jabuuti, Idiris Aarnauut Cali oo booqasho ku jooga Muqdisho.

12/13/2012 7:10 AM EST
Khamiis, December 13, 2012 (HOL) — Ra'iisul wasaaraha Soomaaliya, Cabdi Faarax Shirdoon (Saacid) ayaa maanta dhameystiray xubnaha golaha wasiirrada xukuumadda Soomaaliya, isagoo magacaabay shan wasiir u dowle iyo 20-wasiir ku xigeen.

12/13/2012 5:41 AM EST
Khamiis, December 13, 2012 (HOL) — Mukhtaar Xassan Maxamed oo 27-bishii November ee ina dhaaftay loosoo xiray ama loo qabtay dilka guddoomiyihii gollaha odayaasha dhaqanka gobollka Hiiraan Max’ed Shiikh Xusseen Maryacade ayaa qirty in uu galay danbiga loo soo xiray oo ah in uu ahaa shaqsigii gacantiisa ku toogtay guddoomiyaha.

12/13/2012 1:25 AM EST
Khamiis, December 13, 2012 (HOL) — Abaanduulaha ciidamada xoogga Soomaaliya, Jen. C/kariin Yuusuf Aadan (Dhego-badan) ayaa sheegay inay ka go'an tahay inay isku furaan dhammaan gobollada Soomaaliya, kaddib markii isaga iyo saraakiil kale ay saxaafadda kula hadleen degmada Jowhar.

12/13/2012 1:08 AM EST
Khamiis, December 13, 2012 (HOL) — Madaxweynaha Soomaaliya, Xasan Sheekh Maxamuud ayaa sheegay inaysan wax wadahadal ah la galayn Al-shabaab iyo Al-Qaacida inta ay hubka wataan, balse ciddii ka tanaasusha fikirkooda ayuu sheegay inay soo dhaweynayaan oo ay labada gacmood ku qaadayaan.