Isniin, Abriil 02, 2012 (HOL) — Hay'adda DSI oo taabacsan wakaaladda biyaha dalka Turkiga ayaa maanta oo Isniin ah sheegtay inay Muqdisho ka hirgelisay ceelal ay biyo ka cabaan 30,000 qof oo barakacayaal Soomaaliyeed ah, kuwaasoo daggan xeryo ay dowladda Turkigu ka sameysay Muqdisho.
Barakacayaashan ayaa waxay sheegtay hay'addu inay ahaayeen dad dhibaato badan u mari jiray sidii ay biyo ku heli lahaayeen, taasina ay keentay inay ceelal uga qodaan Muqdisho.
"Ceelasha waxaan ugu talogalnay inay biyo ka cabaan 30,000 qof oo Soomaali ah," ayuu yiri madaxa hay'addan Ahmet Sekerci oo la hadlayay wakaaladda wararka ee dalka Turkiga.
Warbixin ay hay'addu soo saartay ayaa sidoo kale lagu sheegay in saraakiisha DSI in qodidda ceelasha ay sii wadayaan inta ay dadka barakacayaasha ah ka helayaan maalin walba biyo ku filan.
Magaalada Muqdisho ayaa waxaa ku sugan hay'ado fara badan oo kuwa gargaarka ah kuwaasoo ka socda dalka Turkiga, waxayna intooda badan caawiyaan dadkii kusoo barakacay abaaraha iyo kuwa kale ee aan waxba haysan ee Muqdisho ku nool.
Hay'adaha Turkiga ayaa waxay Muqdisho ka wadaan mashaariic kala duwan oo ay ku jiraan kuwa horumarinta, iyagoo xoogga saaraya sidii ay waxbarasho iyo nolol u heli lahaayeen dadkii kasoo barakacay abaarihii ku dhuftay Koonfurta Soomaaliya.
Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya