2014-10-20
Today from Hiiraan Online:  _
Wararka Maanta- Khamiis, Nov 29, 2012
Golaha Wasiirrada oo isku raacay in la sameeyo ciidammo gaar ah oo suga Ammaanka Magaalada Muqdisho


Khamiis, November 29, 2012 (HOL) — Kulan golaha wasiirrada Soomaaliya ay ku yeesheen maanta xaruntooda Muqdisho ayay kasoo saareen qodobbo ay ka mid yihiin in la adkeeyo ammaanka caasimadda Soomaaliya, sidoo kalena dowladdu ay is le'ekeyso dhaqaalaha kasoo xarooda dekedda iyo gasroonka diyaaradaha Muqdisho.

Kulankan oo uu shir-guddoominayay ra'iisul wasaare, Cabdi Faarax Shir-doon ayaa qodobbadii kasoo baxay waxaa ka mid ahaa in ciidammo ka madaxbannaan kuwa qalabka sida ee dowladda Soomaaliya la geeyo degmooyinka Mkuqdisho si ay u xaqiijiyaan ammaanka.

"Golaha wasiirrada waxay shirkooda diiradda ku saareen nabadgalyada, waxaana xusid mudan in la isku raacay in ciidammo gaar ah loo sameeyay sugidda ammaanka 16-ka degmo ee gobolka Banaadir, kuwaasoo ka madaxbannaan ciidamada qalabka sida ee la yaqaan," ayuu yiri wasiirka warfaafinta Soomaaliya, Cabdullaahi Xirsi Ciil-mooge oo saxaafadda la hadlay kulanka kaddib.

Sidoo kale, wasiirku wuxuu sheegay xaafadaha walba oo ka tirsan Muqdisho la geyn doono 100-askari oo qalabkoodu u dhan yahay, isagoo hoosta ka xariiqay inay si joogto ah ciidamadaas u joogi doonaan xaafadda la geeyay ayna sugi doonaan amniga dadweynaha.

"Qorshahan waxaa qayb ka ah in ciidamadan ay dadka deggen ka saaraan xarumihii wasaaradaha dowladda oo ahaa 25 dhisme," ayuu wasiirku hadalkiisa raaciyay, isagoo aan sheegin inta uu le'eg yahay kharashka ku bixi doona ciidamada cusub ee la samaynayo iyo halka ay ka imaanayaa.

Wasiirka warfaafintu wuxuu sheegay in golaha wasiirradu ay istuseen in Muqdisho aysan maanta oolin isbaarooyinkii faraha badnaa ee yaallay, isagoo sheegay in laba isbaaro waxaan ka badnayn ay yaallaan Muqdisho, iyagana la qaadayo saacadaha soo socda.

Dhanka kale, wasiirku wuxuu xusay in sidoo kale kulanka looga hadlay sidii lagu dar-dargelin lahaa howlaha dekedda iyo garoonka diyaaradaha Muqdisho, isagoo xusay inay ka go'an tahay xukuumadda cusub inay isku fileysiiso dhaqaalaha ay ka hesho ilaha dhaqaale ee dalka.

"Golaha wasiirrada waxay isku raaceen in la xaqiijiyo hab-sami u socodka howlaha dekedda iyo garoonka diyaaradaha Muqdisho, sidoo kalena laga baxo ciriiriga ka jira maraakiibta oo maalmo badan dibadda taagnaadaa, ganacsataduna aysan soo dejin karin gadiid duug ah, balse ay soo dejiyaan gaadiid wanaagsan oo howlihiisa gudan kara," ayuu yiri wasiirka wafaafinta Soomaaliya.

Kulanka ay golaha wasiirradu yeesheen maanta oo Khamiis ah ayaa noqonaya kii labaad oo ay yeeshaan tan iyo markiii golaha wasiirrada dowladda Soomaaliya ay cod aqlabiyad ah ku ansixiyeen bartimihii bishan.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya




Post your comments

2012-11-29 8:44 AM EST
Khamiis, November 29, 2012 (HOL) — Munaasabad maanta loo qabtay 650-arday oo ka qalin-jabinayay jaamacada SIMAD ayaa lagu qabtay hoteelka City Palace ee magaalada Muqdisho kuwaasoo isugu jiray wiilal iyo gabadho da'yar, waxaana munaasabadda ka qayb-galay maamulka sare ee jaamacada, macallimiinta, ardayda, waalidiin iyo dadweyne kale oo lagu casuumay.

2012-11-29 7:58 AM EST
Khamiis, November 29, 2012 (HOL) — Saraakiil ka tirsan Ahlusunna oo maanta shir jaraa'id ku qabtay Muqdisho ayaa sheegay in ciidamada Ahlusunna si rasmi ah loogu wareejinayo dowladda Soomaaliya, iyagoo xusay in dagaalkii ay soo galeen uusan ahayn mid ay ku doonayaan inay noqdaan urur gooni-u-goosad ah.

2012-11-29 6:06 AM EST
Khamiis, November 29, 2012 (HOL) — Askari ka tirsan ciidamada dowladda Somalia ayaa haweeney rakaab ahayd dilay, saddex qof oo kale ku dhaawacay rasaas uu si bareer ah ugu furay gaari kuwa dadweynaha ah oo marayay agagaarka tarabuunka Muqdisho.

2012-11-29 5:51 AM EST
Khamiis, November 29, 2012 (HOL) — Iskahorimaad u dhexeeya ciidamada AMISOM iyo xoogagga Al-shabaab ayaa maanta ka dhacay deegaanno ka tirsan gobolka Shabeellada hoose, iyadoo sidoo kale nin bam ku hubeysan uu qarax ku weeraray ciidammo ka tirsan kuwa AMISOM oo ku sugan degmada Marko.

2012-11-29 5:44 AM EST
Khamiis, November 29, 2012 (HOL) — Ugu yaraan lix qof oo labada dhinac ah ayaa ku dhintay toban kalena way ku dhaawacmeen dagaal Arbacadii shalay deegaanka Xudun ee gobolka Sool ku dhexmaray ciidamada Somaliland iyo ciidamada Khaatumo oo diidanaa in doorasho ay halkaas ka dhacdo.

2012-11-29 4:15 AM EST
Khamiis, November, 29, 2012 (HOL) – Maalintii shalay waxaa booqasho ku tagay magaalada Baladweyne ee xarunta gobollka Hiiraan wafdi ka socday xukuumada Soomaaliya oo sidoo kalana ay ka mid ahaayeen xildhibaanno ka tirsan baarlamaanka.

2012-11-29 2:09 AM EST
Khamiis, November 29, 2012 (HOL) — Ra'iisul wasaaraha Itoobiya, Hailemariam Desalegn ayaa sheegay Arbacadii shalay in ciidamada Itoobiya ay sii joogi doonaan Soomaaliya inta ay goobaha ay hayaan kaga wareejinayaan ciidamada Midowga Afrika ka socda ee AMISOM.