2014-11-22
Today from Hiiraan Online:  _
Wararka Maanta- Arbaco, Nov 21, 2012
Al-shabaab oo iska fogeysay Mas'uuliyadda Qaraxii Waxyeellada geystay ee ka dhacay Magaalada Nairobi


Arbaco, November 21, 2012 (HOL) — Xarakada Al-shabaab ayaa iska fogeysay inay mas'uul ka tahay weerarkii qaraxa ahaa ee Axaddii lasoo dhaafay ka dhacay Nairobi kaasoo ay dad badan oo shacab ah wax ku noqdeen.

Afhayeenka howgallada ee Xarakada Al-shabaab, Sheekh C/casiis Abuu-Musacb ayaa sheegay inaysan mas'uul ka ahayn qaraxaas, balse aysan ka xumayn dadkii wax ku noqday.

"Xarakada Al-shabaab mas'uul kama ahan qaraxii ka dhacay xaafadda Islii ee magaalada Nairobi, balse waxaa ka dambeeyay kooxo taageersan Al-shabaab oo ka careysan dhibaatada ay dowladda Kenya ku hayso muslimiinta Soomaaliya iyo kuwa ku sugan dalka Kenya,"ayuu yiri Abuu-Muscab.

Laakiinse afhayeenku wuxuu sheegay inay weerarro ka geysan doonaan gudaha Kenya, si ay uga aargutaan dowladda Kenya oo uu ku eedeeyay inay dhibaatooyin kala duwan ka geysteen gudaha Soomaaliya, sida inay kusoo duuleen.

"Waxaan Kenya ka geysan doonnaa qaraxyo ku lug leh doorashada dalkaas ka dhici doonta sannadka soo socda," ayuu yiri Abuu-Muscab oo aan sheegin goobaha ay sida gaarka ah u beegsan doonaan.

Qaraxii ka dhacay magaalada Nairobi ee xarunta Kenya ayaa waxaa ku dhintay in ka badan sagaal qof, iyadoo ay ku dhaawacmeen 30-qof oo kale, kuwaasoo la dhigay isbitaallada magaalada Nairobi.

Sidoo kale, qalalaase kale oo ka dhashay saddex askari oo Kenya ah oo lagu dilay magaalada Gaarisa ayaa iyaguna sababay dhimasho iyo dhaawac fara badan oo soo gaaray dad shacab ah, waxayna Al-shabaab sidoo kale iska fogeysay rabshadaha ka taagan Gaarisa.

Dowladda Kenya ayaa ku eedeysay Al-shabaab inay mas'uul ka tahay weerarradii ka dhacay Gaarisa iyo Nairobi, inkastoo afhayeenka u hadlay Al-shabaab uu markii ugu horreysay sheegay inaysan lug ku lahayn qalalaasaha ka taagan Kenya.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2012-11-21 8:11 AM EST
Arbaco, November 21, 2012 (HOL) — Baarlamaanka dalka Kenya ayaa maanta ka dooday howgalladii ay ciidamada milateriga Kenya ka fuliyeen magaalada Gaarisa ee gobolka Waqooyi-bari Kenya, kaasoo ay dad ku dhinteen, kuwo kale ay dhaawacyo, sidoo kalena geystay burbur hantiyeed oo fara badan.

2012-11-21 7:39 AM EST
Arbaco, November 21, 2012 (HOL) — Maxkamadda ciidamada qalabka sida ee dowladda Soomaaliya ayaa maanta xabsiga dhigtay wariye Ibraahim Maxamed Aadan oo ahaa wariyihii BBC-da laanta afka Soomaaliga uga warrami jiray magaalada Muqdisho ee xarunta Soomaaliya.

2012-11-21 7:07 AM EST
Arbaco, November 21, 2012 (HOL) — Tababar ku saabsan horumarinta ganacsiga bulshada ayaa maanta laga furay Muqdisho, kaasoo socon doono muddo shan casho ah oo ka billaabanaysa maanta kuna eg Axadda soo socota, waxaana ka faa'iideysan doona tababarka 19 qof oo ka socday shirkado ka howgala Soomaaliya.

2012-11-21 6:43 AM EST
Arbaco, November 21, 2012 (HOL) — Madaxweynaha Soomaaliya, Mudane Xasan Sheekh Maxmuud ayaa xarunta madaxtooyada Soomaaliya kula kulmay wafdi ka socday dalka Ingiriiska, isagoo ku wareejiyay dhul ay ka dhistaan safaaraddooda Soomaaliya.

2012-11-21 6:31 AM EST
Arbaco, November 21, 2012 (HOL) — Madasha bulshada rayidka Soomaaliya ayaa ka doodday lixdii qodob ee uu ku dhawaaqay madaxweynaha Soomaaliya kuwasaoo uu sheegay inay saldhig u noqon doonaan waxqabadka dowladdiisa, waxayna sidoo kale ugu hambalyeeyeen ra’iisul wasaare Soomaaliya, Cabdi Faarax Shir0doon (Saacid) sida uu uga gudbay hannaankii wax-qeybsi ee 4.5 iyo kaalintii uu xubnihii uu haweenka ka siiyay golihiisa wasiirradda oo ay sheegeen inay tahay mid aan horay loo arag.

2012-11-21 6:16 AM EST
Arbaco, November 21, 2012 (HOL) — Safaaradda Soomaaliya ay ku leedahay dalka Belgium ayaa ku guuleysatay inay xarunta safaaraddaas ka saarto dad si sharci daro ah kuu deggenaa muddo 18 sano ah, iyadoo arrintan ay timid kaddib markii ay maxkamadda Belgium go'aan ku gaartay in in dadka deggen xaruntaas safaaradda ay isaga baxaan.

2012-11-21 5:07 AM EST
Arbaco, November 21, 2012 (HOL) —Wararka aynu ka heleyno magaalada Kismaayo ayaa sheegaya in saaka aroortii uu dagaal xooggan ka dhacay deegaanka Yoontoy oo qiyaastii 25-KM dhanka waqooyi kaga began magaalada Kismaayo ee xarunta gobolka Jubada Hoose.

2012-11-21 1:40 AM EST
Arbaco, November 21, 2012 (HOL) — Guddoomiyaha baarlamanka Soomaaliya, Prof. Maxamed Sheekh Cismaan (Jawaari) ayaa sheegay in toddobaadka soo socda ay xubnaha baarlamaanka Soomaaliya ansixin donaan xeer hoosaadka baarlamanka uu ku shaqeynayo afarta sano ee soo socota, iyadoo ay toddobadyadii lasoo dhaafay socdeen doodo ay xildhibaannadu ka yeelanayaan qodobbada xeer hoosaadka.

2012-11-21 1:36 AM EST
Arbaco, November 21, 2012 (HOL) — Wasiirka gaashaandhigga Kenya, Maxamed Yuusuf Xaaji ayaa gaaray magaalada Gaarisa ee gobolka Waqooyi-bari Kenya gallinkii dambe ee shalay oo Salaaso ahayd, iyadoo la sheegay in xaaladdu ay saakay tahay mid deggen.