2014-11-01
Today from Hiiraan Online:  _
Wararka Maanta- Axad, Nov 18, 2012
Ciidamada Dowladda Soomaaliya oo saakay gaaray deegaan aad ugu dhow Degmada Jowhar ee Gobolka Shabeellada dhexe


Axad, November 18, 2012 (HOL) — Ciidamada dowladda Soomaaliya oo gaadiidka dagaalka ayaa gaaray saakay oo Axad ah deegaanka Garsale oo ku dhow degmada Jowhar ee xarunta gobolka Shabeellada dhexe.


Wararka ayaa waxay sheegayaan in ciidamada dowladda aysan wax iska-caabin ah la kulmin intii ay ku socdeen jidka dheer ee isku xira degmada Balcad iyo deegaanka Garsaale oo ay hadda ku sugan yihiin.

"Saakay ciidamada dowladdu waxay gaareen deegaan dhowr iyo toban kiiloo-mitir u jira degmada Jowhar, waxaana ciidamada ka go'an inay la wareegaan degmadaas," ayuu yiri sarkaal sare oo ka tirsan ciidamada dowladda Soomaaliya.

Degmada Jowhar oo 90-km dhinaca waqooyi ka xigta Muqdisho ayaa ah degmadii ugu dambeysay degmooyinka waaweyn ee ay Al-shabaab ka taliso, iyadoo aysan qayb ka ahayn duullaankan ciidamada AMISOM ee ka socda Midowga Afrika.

"Ciidammo badan oo wata gaadiidka dagaalka ayaa buuxiyay deegaanka Garsaale, arrintu waxay u muuqataa mid dagaal, balse ma jirin wax dagaallo ah oo socda," ayay yiraahdeen rakaab kasoo tagay degmada Jowhar oo soo maray jidka dheer ee isku xira Muqdisho iyo Jowhar.

Xaaladda degmada Jowhar ayaa deggen iyadoo dadka ku sugan degmadaas ay sheegeen in wax walba ay si caadi ah u socdaan, ayna degmada ku sugan yihiin xoogagii Al-shabaab ee horay u joogay.

Dowladda Soomaaliya oo garabsanaysa ciidamada ka socda Midowga Afrika ayaa waxay tan iyo horraantii sannadkan dagaal ay deegaanno badan ku qabsadeen la galeen xoogagga Al-shabaab, waxaana goobaha ay ka qabsadeen ka mid ah degmada Kismaayo.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya




Post your comments

2012-11-18 9:39 AM EST
Axad, November 18, 2012 (HOL) — Lix qof oo rakaab ay ayaa ku dhimatay kadib markii gaari nooca Rakaabka qaado uu ku qarxay nawaaxiga Kaniisad ku taal xaafadda Islii gaar ahaan nawaaxiga waaxda Sec1.

2012-11-18 6:53 AM EST
Axad, November 18, 2012 (HOL) — COL Cabaasi Ibraahim Gureey oo kamid ah saraakiisha hogaamisa ciidamada dowladda ee gobolka Gedo ayaa sheegay in shacabka Jubooyinka ay xaq u leeyihiin in ay iyaga soo dhistaan maamulkooda.

2012-11-18 5:21 AM EST
Axad, November 18, 2012 (HOL) — Afhayeenka Xarakada Al-shabaab, Sheekh Cali Maxamuud Raage (Sheekh Cali Dheere) ayaa ugu baaqay qurbo-joogta Soomaalida inay faraha kala baxaan siyaasadda dalka, isagoo uga digay inay dalalka reer galbeedku u adeegsadaan siyaasadda dalkooda.

2012-11-18 3:45 AM EST
Axad, November 18, 2012 (HOL) — Dhismaha garoon diyaraadeed Cusub ayaa ka bilowday degmada Ceelwaaq ee gobolka Gedo, iyadoona dhismaha garoonkani ay iska kaashanayaan maamulka gobolka Gedo iyo hay’adda cuntada Aduunka ee WFP.

2012-11-18 3:33 AM EST
Axad, November 18, 2012 (HOL) — Shirkadda isgaarsiinta Hormuud ayaa matoor dab-dhaliye ah ugu deeqday isbitaalka Masaarida ee magaalada Muqdisho, iyadoo maamulka isbitaalkaas uu soo dhaweeyay.

2012-11-18 3:18 AM EST
Axad, November 18, 2012 (HOL) — Dadweynaha ku nool degmada Gaarisa ee gobolka Waqooyi-bari Kenya ayaa ka cabanaya xaalado ammaan-darro oo kusoo kordhay degmadaas, kuwaasoo sababay in degmadaas lagu dilo dad badan oo ay ku jiraan saraakiil ka tisran booliiska Kenya.