2014-04-19
Today from Hiiraan Online:  _
Wararka Maanta- Sabti, Nov 17, 2012
Dowladda Masar oo sheegtay in ay taageeri doonto Shacabka Falastiin
Sabti, November 17, 2012 (HOL) —Kadib booqasho uu ra’isul wasaaraha dalka Masar Hisham Qandal ku tagay magaalada Qasa ee dhulka Falastiin ayuu sheegay in dowladda Masar aysan indhaha ka daboolan doonin dhibaatada ka taagan halkaasi.

Ra’isul wasaaraha ayaa ugu baaqay dowladda Israa’iil inay joojiso duqeymaha ay ka wado halkaasi, isagoona xusay in waxa uu arkay ay tahay masiibo aan laga aamusi karin.

Masuulkani ayaa sidoo kale sheegay in dowladda Masar ay dadaal ku bixin doonto sidii loo hakin lahaa dagaallada iyo duqeymaha ba’an ee halkaasi ka jira.

Duqeymo ayaa lagu soo waramayaa in ay ku socdeen Qasa xilligii uu booqashada ku joogay ra’isul wasaaraha dalkaMasar, wallow dowladda Israa’iil ay ballan qaaday in ay xabad joojin sameyn doonto mudada uu boqashada ku joogo ra’isul wasaaraha Masar.

Dowladda Israa’iil ayaa dafirtay in ay fulisay weerarradii shalay lagu qaaday magaalada Qasa balse waxay sheegtay in 50 Gantaal ay uga soo dhaceen dhanka Qasa xilligii uu booqashada ku joogay ra’isul wasaaraha Masar.

Weerarrada sedexdii maalin ee ugu danbeeyay ay fulisay dowladda Israa’iil ayaa la sheegay in ay ku dhinteen in ka badan 28 qof oo reer Falastiin ah, kuwaasoo ay kamid ahaayeen dad rayid ah.

Gantaal maalintii khamiista laga tuuray dhanka Qasa ayaa la sheegay in sedex qof oo reer Israa’iil ah uu ku dilay magaalada Kiryat Malachi.

Ururka Xamaaz ayaa sidoo kale duqeymo ka geestay magaalada Tel-aviv ee dalka Israa’iil, waxaana dowladda Israa’iil ay daartay qalabka digniinta ka bixiya duqeymaha.

Booqashada ra’isul wasaaraha dalka Masar uu ku tagay magaalada Qasa ayaa kusoo beegmeysa xilli madaxweeynaha dalka Masar khudbad uu jimcadii Masaajid ku yaal magaalada Qaahira ka jeediyay uu ku sheegay in dowladiisu aysan daawan doonin dhibaatooyinka ka jira Marinka Qasa.

Dhinaca kale wasiirka arimaha dibadda Tunisia ayaa isna la filayaa in maanta uu booqasho ku tago Marinka Qasa.

Xasan Nuur, Hiiraan Online
hnur@hiiraan.com
Kismaayo, Soomaaliya





Post your comments

2012-11-17 8:27 AM EST
Sabti, November 17, 2012 (HOL) — Wasiirka arrimaha dibadda ee dalka Jabuuti, Maxamuud Cali Yuusuf ayaa sheegay in Soomaaliya ay u baahan tahay balaayiin doollar si dib loogu dhiso, isagoo sheegay in lacagaha yaryar ee mar walba la sheego in loogu deeqay aysan waxba u tagayn Soomaaliya.

2012-11-17 7:23 AM EST
Sabti, November 17, 2012 (HOL) — Mark Bowden oo ah xiriiriyaha Qaramada Midoobay u qaabilsan gargaarka bani'aadamnimo ee Soomaaliya oo shir jaraa'id ku qabtay maanta magaalada Nairobi ayaa sheegay in 2.5 milyan qof oo Soomaali ah ay weli u baahan yihiin gargaar bani'aadamnimo.

2012-11-17 6:58 AM EST
Sabti, November 17, 2012 (HOL) — Kulan wadatashi iyo isbarasho ah ayaa maanta dhexmaray wasiirradii hore ee xukuumaddii KMG ahayd iyo wasiirrada cusub iyadoo kulankan uu shir guddoominayay ra'iisul wasaaraha Soomaaliya, Cabdi Faarax Shir-doon.

2012-11-17 6:20 AM EST
Sabti, November 17, 2012 (HOL) — Hay'adda Wadahadalka Bulshada ee CCD ayaa maanta dood-cilmiyeed looga hadlayay gabdhaha khasab lagu guursado Muqdisho ugu qabatay haween ka kala socday 16-ka degmo ee gobolka Banaadir. iyadoo lagu falanqeeyay doodda sidii looga hortagi lahaa in gabadha si khasab ah loogu guuriyo qof aysan raalli ka ahayn.

2012-11-17 3:47 AM EST
Sabti, November 17, 2012 (HOL) — Ciidamada Soomaaliya iyo kuwa Midowga Afrika ee AMISOM ayaa Al-shabaab ka saaray deegaanno ay ku xoogganayd oo ku yaalla gobollada Jubbada Hoose iyo Gedo ee Koonfurta Soomaaliya, laakiin hadda waxaa ka taagan deegaannadaas dagaal siyaasadeed ku aaddan ciddii maamuli lahayd.

2012-11-17 2:47 AM EST
Sabti, November 17, 2012 (HOL) — Ciidamada Midowga Afrika ee AMISOM ayaa isbitaallo lagu daweeyo dadka xanuunsan ka furay deegaanno ku yaalla gobolka Shabeellada kuwaasoo ay ka qabsadeen xoogagga Al-shabaab oo muddo sannado ah ka talinayay.

2012-11-17 2:33 AM EST
Sabti, November 17, 2012 (HOL) — Madaxweynihii hore ee Dowladdii KMG ahayd ee Soomaaliya, Shariif Sheekh Axmed iyo qoyskiisa ayaa shalay oo Jimco ka guuray magaalada Muqdisho, iyagoo kusii jeeda dalka Uganda, halkaasoo degenaasho ay ka heleen.