Khamiis, Jannaayo 19, 2012 (HOL) − Wasiirka maaliyadda Kenya, Uhuru Kenyata ayaa sheegay inaysan Kenya oo keliya bixin karin dhaqaalaha lagula dagaalamayo Xarakada Al-shabaab, isagoo sheegay in dagaalkan uu culeys dhaqaale oo weyn ku hayo dalkiisa.
Wasiirka oo la hadlayay BBC-da ayaa sheegay in dhaqaalaha ku baxaya dagaalka ay kula jiraan Al-shabaab uu yahay canshuurta laga soo ururiyo shacabka dalka, isagoo sheegay
"Shaki kuma jiro in dagaalkan uu culeys dhaqaale ku hayo Kenya... kuuma sheegi karo lacagta ku baxda, balse waxaan kuu caddeyn karaa inuu culeys dhaqaale oo weyn jiro," ayuu yiri Kenyata.
Wasiirka oo la taliye u ah ra'iisul wasaaraha Kenya ayaa wuxuu hadalkiisa ku daray in dagaalka ay Kenya ku jirto uu yahay mid aysan keli ku ahayn, balse uu yahay dagaal ay kula jirto koox argagaxiso ah oo khatar ku ah dunida oo dhan.
"Danta ayaa kugu qasbaysa inaad dagaal gasho adigoo aan doonayn... dagaalkan waan ku qasbanaanay waayo waxaa khatar la geliyay dhaqaalaheenna oo ku tiirsan dalxiiska," ayuu yiri Kenyata.
Mr. Uhuru Kenyata oo ka mid ah xubnaha u sharraxan xilka madaxweynimo ee Kenya oo doorashadiisu ay dhacayso sannadkan ayaa wuxuu hadalkiisa ku daray inay hoos u dhigeen khatartii kaga imaanaysay Al-shabaab oo uu sheegay inay weerarro ka fulin jirtay gudaha dalkeeda, gaar ahaan goobaha dalxiiska.
Ugu dambeyn, wasiirka maaliyada Kenya wuxuu sheegay inay Qaramada Midoobay iyo Midowga Afrika ay ka rajeynayaan inay ka taageen dhaqaalaha dagaalka ay kula jiraan Xarakada Al-shabaab.
Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya