2014-10-22
Today from Hiiraan Online:  _
Wararka Maanta- Khamiis, Dec 13, 2012
Abaanduulaha Ciidamada Xoogga dalka oo sheegay inay ka go'an tahay inay isku furaan Gobollada Soomaaliya


Khamiis, December 13, 2012 (HOL) — Abaanduulaha ciidamada xoogga Soomaaliya, Jen. C/kariin Yuusuf Aadan (Dhego-badan) ayaa sheegay inay ka go'an tahay inay isku furaan dhammaan gobollada Soomaaliya, kaddib markii isaga iyo saraakiil kale ay saxaafadda kula hadleen degmada Jowhar.

Jen. Dhego-badan ayaa sheegay in ciidamada dowladda ay dhawaan isku furi doonaan gobolka Shabeellada dhexe illaa gobolka Bari ee Puntland, sidoo kalena ay isku furi doonaan dhammaan gobollada Koonfureed ee Soomaaliya.

"Qorshaheennu waa inaan isku furno Jowhar iyo Bari, sidoo kalen gobollada ku yaalla Koonfurta ayaa iyagana isku furi doonnaa, inta arrimahaas ay suurogal ka noqonayaanna dagaalka waan wadaynaa," ayuu yiri abaanduulaha ciidamada xoogga dalka.

Magaalada Jowhar ayaa laba casho ka hor waxaa la wareegay ciidamada dowladda iyo kuwa AMISOM oo iskaashanaya, iyagoo afhayeen Al-shabaab u hadlay uu sheegay inay xeelad dagaal awgeed uga baxeen degmada Jowhar.

Jen. Cali Caraaye Cosoble (Gacma-duulle) oo isaguna wariyeyaasha la hadlay ayaa sheegay in ciidamada dowladda ee ku sugan gobolka Shabeellada dhexe ay wadaan qorshe ay degmooyinka kale ee gobolkaas ku qabsanayaan, isagoo xusay in dhowr degmo oo gobolkaas ka tirsan ay Al-shabaab isaga baxday.

Goobjoogayaal ku sugan degmada Jowhar ayaa sheegay in xaaladda degmadu ay tahay mid aad u deggen, iyagoo sheegay inay dib u furteen ganacsigooda aysanna jirin cid dhibaatooyin u geysatay.

Col. Maxamed Saney oo isaguna ka mid ah saraakiisha ciidamada dowladda ee ku sugan gobolka Shabeellada dhexe ayaa isaguna sheegay inay yihiin kuwo deggen degmooyinka ay dowladdu kaga sugan tahay gobolkaas, wuxuuna xusay inay kasii shaqeyn doonaan sidii ay ammaanka u adkeyn lahaayeen.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2012-12-13 8:50 AM EST
Khamiis, December 13, 2012 (HOL) — Kulan looga hadlay ammaanka iyo horumarinta gobolka Hiiraan oo uu ka qaybgalay ugaaska beesha Xawaadle, ugaas C/raxmaan Ugaas Khaliif Ugaas Rooble ayaa maanta lagu qabtay hoteelka Ambassador ee magaalada Muqdisho.

2012-12-13 8:41 AM EST
Khamiis, December 13, 2012(HOL): Xuska 40 guurada far-soomaaliga ayaa lagu qaban doonaa magaalada Jabuuti ee dalka Jamhuuriyadda Jabuuti 17ka ilaa 22ka bishan Disambar ee 2012ka. Xuskan, oo noqon doona mid ballaadhan, waxa lagu martiqaaday madaxda Soomalida ee geeska Afrika.

2012-12-13 8:31 AM EST
Khamiis, December 13, 2012 (HOL) — Afhayeenka ururka raaskambooni, Cabdinaasir Seeraar Maax ayaa sheegay in ammaanka magaalada Kismaayo ee xarunta gobolka Jubbada Hoose uu yahay mid ka wanaagsan sidii hore, isagoo xusay in dadkii horay uga barakacay magaaladaas ay dib ugu soo laabanayaan.

2012-12-13 8:12 AM EST
Khamiis, December 13, 2012 (HOL) — Guddomiyaha Urursiyaasadeedka Rays Mr; Xasan Maxmed Cali (Gaafaadhi), ayaa sheegay in aanu ku qanacsanayn Natiijada ay soo saareen guddida doorashooyinku, maadaama oo wax isdaba marin iyo musuqmaasuq badani uu hadheeyey, waxaanu ugu baaqay komishanka inay is casilaan mar haddii ay masuuliyadii ummadda u hayeen ka soo bixi waayeen.

2012-12-13 7:45 AM EST
Khamiis, December 13, 2012 (HOL) — Madaxweynaha Soomaaliya, Xasan Sheekh Maxamuud ayaa maanta oo Khamiis ah xarunta madaxtooyada Soomaaliya kulan albaabbadu u xiran yihiin kula qaatay, guddoomiyaha baarlamaanka dalka Jabuuti, Idiris Aarnauut Cali oo booqasho ku jooga Muqdisho.

2012-12-13 7:10 AM EST
Khamiis, December 13, 2012 (HOL) — Ra'iisul wasaaraha Soomaaliya, Cabdi Faarax Shirdoon (Saacid) ayaa maanta dhameystiray xubnaha golaha wasiirrada xukuumadda Soomaaliya, isagoo magacaabay shan wasiir u dowle iyo 20-wasiir ku xigeen.

2012-12-13 5:41 AM EST
Khamiis, December 13, 2012 (HOL) — Mukhtaar Xassan Maxamed oo 27-bishii November ee ina dhaaftay loosoo xiray ama loo qabtay dilka guddoomiyihii gollaha odayaasha dhaqanka gobollka Hiiraan Max’ed Shiikh Xusseen Maryacade ayaa qirty in uu galay danbiga loo soo xiray oo ah in uu ahaa shaqsigii gacantiisa ku toogtay guddoomiyaha.

2012-12-13 1:08 AM EST
Khamiis, December 13, 2012 (HOL) — Madaxweynaha Soomaaliya, Xasan Sheekh Maxamuud ayaa sheegay inaysan wax wadahadal ah la galayn Al-shabaab iyo Al-Qaacida inta ay hubka wataan, balse ciddii ka tanaasusha fikirkooda ayuu sheegay inay soo dhaweynayaan oo ay labada gacmood ku qaadayaan.

2012-12-13 1:04 AM EST
Khamiis, December 13, 2012 (HOL) — 24-kii saac ee lasoo dhaafay waxaa xeebta degmada Garacad ee gobolka Mudug ka dhacay dagaallo khasaare dhaliyey oo dhex maray ciidamada badda ee Puntland iyo kooxo burcad-badeed ah.