2014-10-31
Today from Hiiraan Online:  _
Wararka Maanta- Isniin, Dec 12, 2012
Guddoomiyaha Degmada Gaarisa ee dalka Kenya oo sheegay in la qabtay dad Soomaali ah iyo hub ay wateen


Arbaco, December 12, 2012 (HOL) — Ciidamada dalka Kenya ee ku sugan xuduudda u dhexeysa Soomaaliya iyo Kenya ayaa gacanta ku dhigay shalay gallinkii dambe lix qof oo Soomaali ah iyo hub ay wateen, kuwaasoo la sheegay inay ka yimaadeen xeryaha qoxootiga Dhadhaab ayna hubka u wadeen degmada Gaarisa.

Guddoomiyaha Degmada Gaarisa, Maxamed Macallin ayaa sheegay in afar qof oo ka mid ah dadka hubka watay ay baxsadeen, kaddib baabuurkii ay saarnaayeen lagu joojiyay deegaanka Lagdheera oo ka tirsan degmada Gaarisa.

"Toban qof ayay ahaayeen dadka hubka watay, waxaase noo suurogashay inaan qabannay lix qof oo ka mid ah oo ay ku jiraan laba haween ah, waxayna dadkaasi wateen hub isugu jiray bastoolado, bambooyinka gacanta iyo rasaas," ayuu yiri Maxamed Macallin.

Sidoo kale, guddoomiyaha ayaa sheegay in hubkan la doonayay in dhibaatooyin looga geysto degmada Gaarisa ee xarunta gobolka Waqooyi-bari ee Kenya, laguna qabtay howgal ballaaran oo lagu sugayay ammaanka.

"Dadka la qabtay su'aalo ayaa la weydiinayaa, waxaase wararka hordhaca ah ay sheegayaan inay ka yimaadeen dhinaca xeryaha qoxootiga Dhadhaab ee Kenya," ayuu yiri guddoomiyaha degmada Gaarisa oo dhaawanahan ay ka dhacayeen falal isugu jira qaraxyo iyo dilal qorsheysan.

Ugu dambeyn, guddoomiyaha Gaarisa wuxuu sheegay inay xog ku heleen hubka iyo dadka watay taasna ay keentay in la qabto, isagoo shacabka Kenyanka ah ugu baaqay inaysan gaadiidkooda ka kireyn wuxuu ugu yeeray burcadda dhibaatooyinka ka geysanaya dalkooda.

Maalmahan waxaa xuduudda u dhexeysa Soomaaliya iyo Kenya lasoo dhoobay ciidammo fara badan oo Kenyan ah, kuwaasoo baaritaanno ku sameynayay gaadiidka iyo dadka u gudbaya gudaha dalka Kenya.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya




Post your comments

2012-12-12 11:29 AM EST
Arbaco, December 12, 2012 (HOL) — Magaalada Hargeysa waxa maanta ka dhacay aroos wadareedkii ugu badnaa sanadkan, waxaana dhamaan camirnaa hoteellada waaweyn ee inta badan ay ka dhacaan xafladaha meherka iyo aroosyada iyadoo la waayay hoolal la kiraysto.

2012-12-12 8:39 AM EST
Arbaco, December 12, 2012 (HOL) — Ugu yaraan laba qof oo uu ku jiray nin Injineer ah ayaa ku dhintay shil gaari oo ka dhacay isgoyska Dabka ee waddada Maka Al-mukarama ee magaalada Muqdisho, iyadoo sidoo kale uu shilkaas ku dhaawacmay wadihii gaariga shilka galay oo ahaa nooca raaxada.

2012-12-12 8:17 AM EST
Arbaco, December 12, 2012 (HOL) — Garsoorayaal iyo xeer ilaaliyeyaal tiradoodu ahayd 90 ayaa maanta tababar loogu soo gabgabeeyay magaalada Muqdisho ee xarunta dalka Soomaaliya, kaddib tababar u socday muddo hal sano ah.

2012-12-12 7:19 AM EST
Arbaco, December 12, 2012 (HOL) — Urur siyaasadeedkii saddexaad ee bishan gudeheeda la furo ayaa looga dhawaaqay magaalada Boosaaso ee xarunta gobolka Bari shalay oo Talaado ahayd. Ururkan oo magaciisu yahay [Midnimo] waxaa ku bahoobay in badan oo kamid ah aqoonyahanka iyo ganacsatada waaweyn ee Puntland.

2012-12-12 7:04 AM EST
Arbaco, December 12, 2012 (HOL) — Maxkamad ku taalla magaalada San Diego ee dalka Mareykanka ayaa gabar Soomaaliyeed oo lagu eedeeyay inay lacag gaaraysa 1,450 doollar u dirtay dalka Mareykanka ku xukuntay sideed sano oo xabsi ah, sidoo kale maxkamaddu waxay xukuntay nin Suuriya u dhashay oo la sheegay inuu doonayay inuu ku biiro Al-shabaab.

2012-12-12 6:15 AM EST
Arbaco, December 12, 2012 (HOL) — Guddoomiyaha baarlamaanka dalka Jabuuti iyo wafdi uu hoggaaminayo ayaa soo gaaray maanta magaalada Muqdisho iyagoo kulan la yeeshay xildhibaanada baarlamaanka Soomaaliya, kaasoo ay uga hadleen safarka ay ku yimaadeen Muqdisho.

2012-12-12 1:58 AM EST
Arbaco, December 12, 2012 (HOL) — Hay'adda isku-duwidda gargaarka bani'aadamnimo ee Qaramada Midoobay UNOCHA ayaa sheegtay in xaalad cunno-yari iyo mid bani'aadamnimo oo khatar ah ay ka jiraan Soomaaliya; iyagoo sheegay in afar milyan oo Soomaali ah ay u baahan yihiin gargaar bani'aadamnimo oo kala duwan.

2012-12-12 1:56 AM EST
Arbaco, December 12, 2012 (HOL) — Hoggaamiyaha Xarakada Al-shabaab, Sheekh Mukhtaar C/raxmaan Abuu-Zubeyr oo farriin maqal ah soo dhigay bar Internet oo taageerta Al-shabaab ayaa ku sheegay inay weli iyagu ka taliyaan gobolladii ay Kenya qabsatay, isagoo fariin u diray muslimiinta ku nool dalalka Kenya iyo Itoobiya.