2014-07-28
Today from Hiiraan Online:  _
Wararka Maanta- Talaado, Dec 11, 2012
Mudanayaasha Baarlamaanka Soomaaliya oo su'aalo weydiiyay laba wasiir oo ka tirsan Xukuumadda Soomaaliya


Talaado, December 11, 2012 (HOL) — Mudanayaasha Baarlamaanka Soomaaliya ayaa maanta su'aalo weydiiyay ra'iisul wasaare ku xigeenka ahna wasiiradda arrimaha dibadda ee Soomaaliya, Fowziyo Yuusuf Xaaji Aadan iyo wasiirka Gaashaandhigga, C/xakiin Maxamuud Xaaji Fiqi.


Su'aalaha wasiirradan la weydiiyay ayaa waxay kala ahaayeen, sababtii loo xiray wariyihii BBC-da ee Muqdisho, Ibraahim Maxamed Aadan iyo sababtii loo kireeyay safaaraddii ay Soomaaliya ku lahayd dalka Talyaaniga.

"Waxaa naga go'an inaan ka daba-tagno dhammaan hantida Qaranka Soomaaliyeed ee dibadda ku maqan, sida guryaha, diyaaradaha iyo maraakiibta. Laakiin su'aasha aad i weydiiseen waa mid aniga iga horreysay. Aniga iyo ra'iisul wasaaruhuna waan ka hadalnay mowqifka dowladda ee ku aaddan hantida Qaran ee maqan," ayay tiri wasiiradda arrimaha dibadda ee Soomaaliya.

Sidoo kale, wasiiraddu waxay sheegtay in guddi ay iyadu madax u tahay loo saaray daba-galka hantida Qaranka Soomaaliyeed ee dibadda ku maqan, iyadoo intaas ku dartay in inay direen dad uga soo warbixiya hantida Qaranka ee maqan iyaguna ay ka warsugayaan wixii ay u soo gudbiyaan.

Dhanka kale, wasiirka gaashanadhiga Soomaaliya ayaa isagana la weydiiyay su'aal ku saabsanays sababtii keentay in maxkamadda ciidamada qalabka sida ay xirto wariyihii BBC-da, isagoo sheegay in xariga wariyaha uu ku yimid tabinta war ku saabsan in si xaq-darro ah ay maxkamaddu u dishay wiil Soomaaliyeed oo lagu magcaaaba C/qaadir Yoonis, kaasoo aan loo qaban wax qareen oo ah u dooda.

"Xaqiiqdii wariye Ibraahim shaqada waa ku cusbaa, wuxuu shaqeynayay laba bilood oo keliya, waxaana caddaatay inuusan lahayn tababar iyo xirfad ku filan shaqada uu hayo. Markii maxkamaddu ay weydiisay inuu maxkamadda horteeda keeno ama u sheego ninka sheegay inuu yahay abbaha wiilka la dilay wuuna awoodi waayay, wuxuuna sheegay inay aabbaha uu wargeystay uu ku sugan yahay Jowhar weligiina uusan  la kulmin - caddeyn aan ahayn wareysigiisana uusan ahayn, taasina waxay caddeyn u noqotay in wariyuhu ku xad-gudbay howshiisa," ayuu yiri C/xakiin Fiqi.

Wasiirku wuxuu sheegay in wafdi ka socda BBC-da ay Muqdisho yimaadeen ayna raalli-gelin ka bixiyeen warkii ay sii daayeen, wuxuuna xusay in taasi ay keentay in lasii daayo wariyaha oo hadda aan ku jirin gacanta ciidamada xoogga dalka.

Ugu dambeyn, guddoomiyaha baarlamaanka Soomaaliya, Prof. Maxamed Cismaan (Jawaari) ayaa su'aalaha kaddib hadalka qaatay isagoo u mahadceliyay labada wasiir soo xiray kulanka, wuxuuna guddoomiyhu ku baaqay inaan la dhibaateyn wariyeyaasha, sidoo kalena wariyeyaashu ay iska ilaaliyaan xadgudubyada.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya




Post your comments

2012-12-11 7:10 AM EST
Talaado, December 11, 2012 (HOL) — Ganacsade Cismaan Axmed Rooble oo ahaa wasiirkii ugu horreeyay ee maaliyadda iyo lacagta Soomaaliya ayaa ku geeriyooday magaalada London ee xarunta dalka Britain maqribnimadii xalay isagoo 93 jir ahaa.

2012-12-11 6:32 AM EST
Talaado, December 11, 2012 (HOL) — Guddida Doorashooyinka ayaa arrintii khilaafku ka taagnaa ee natiijadda degmadda Hargeysa iskaga gudbiyey maxkamadda gobolka Hargeysa, iyagoo soo jeediyey in cidii dacwad qabta loo gudbiyo maxkamadda gobolka.

2012-12-11 6:13 AM EST
Talaado, December 11, 2012 (HOL) — Ciidamo maamulka gobollka Hiiraan iyo kuwa ka socda dalka Jabuuti ee ku howlgalaya magaca AMISOM ayaa maalmihii ugu danbeeyayba siweyn isugu howlanaa sugida amniga magaalada Baladweyne.

2012-12-11 5:55 AM EST
Talaado, December 11, 2012 (HOL) — Fannaaniinta kala ah; Qaalid Shariif Axmed (King Qaalid), Cabdixakiin Ciise Geeddi (Farayare) iyo Xasan Cujeer Cajami ayaa si weyn loogu soo dhaweeyay maanta garoonka diyaaradaha caalamiga ah ee Muqdisho.

2012-12-11 2:25 AM EST
Talaado, December 11, 2012 (HOL) — Ra'iisul wasaaraha Itoobiya, Hailemariam Desaleng ayaa ka hadlay markii ugu horreysay arrimaha Jubbooyinka isagoo xusay in arrintaas aysan ahayn mid culeys badan leh, ayna tahay in dowladda Soomaaliya ay hoggaanka u qabato arrimaha Jubbooyinka.

2012-12-11 2:20 AM EST
Talaado, December 11, 2012 (HOL) — Ururka Midowga Afrika ayaa shaaciyay in ciidamadooda ku sugan Soomaaliya ee AMISOM ay difaaci doonaan xuquuqul aadanaha Soomaaliya, kaddib markii shalay la qabtay maalinta xuquuqda aadanaha ee adduunka oo ku beegnayd Isniintii shalay.