Axad, March 13, 2011(HOL): Dad badan oo Soomaali ah oo qaxooti ku ahaa dalalka Yemen iyo Liibiya ayaa dalalkaas ay qaxootinimada ku joogeen waxaa ku qabsaday dagaallo u dhaxeeya dowladaha wadamadaas ka taliyaha iyo dad ka soo horjeeda.
Inkastoo aan ilaa iyo haatan la soo sheegin dad Soomaali ah oo ku dhintay rabshadaha ka taagan labadan dal, addana waxay dani ku kaliftay dadkani in ay mar kale sii barakacaan oo ay dagaal uga cararaan dalalkii ay miciinsadeen kaddib markii dalkoodii Soomaaliya uu dagaal ka bixi waayay muddo 20 sano iyo ka sii badan ah.
Labadan dal ee Liibiya iyo Yemen ayaa waxay Qaxootiga Soomaaliyeed badankood u tagaeen in ay uga sii gudbaan dalal kale oo ay isleeyihiin nabad iyo nolol waa ka heli kartaan, waxayna inta badan qorsheynayeen markii ay tegayeen Yemen iyo Liibiya in ay uga sii tallaabaan dalalka Talyaaniga, Malta iyo Sacuudiga.
Horay waxaa barakac ugu sigtay Soomaali badan oo ku nool dalka Masar, kuwaasi oo markii ay dibadbaxyada rabshadaha wata ka dhacayeen dalkaas naftooda u baqay, inkastoo ay cabsidaas la qabeen dadka rayidka ah ee dalkaas u dhashay.
Xafiiska wararka Hiiraan Online
webmaster@hiiraan.com