Axad, 13 Maarso, 2011 (HOL) – Burcadbadeedda Soomaalida ayaa lagu wadaa inay sii daayaan maanta oo Isniin ah ama berri oo Tallaado ah 26-badmaaxe oo u dhashay dalka Bangaladesh, kuwaasoo lagu afduubay markab lagu magacaabo MV Jahan Moni oo laga soo afduubay meel ku xeebaha dalka Hindiya muddo saddex bilood laga joogo.
Wasaaradda arrimaha dibadda ee dalka Bagaladesh ayaa sheegtay in kooxaha burcadbadeedda ah ay la yeesheen wadahadallo lagu sii-daynayo badmaaxiintan, balse lama sheegin in lagu sii-daynayo madaxfurasho iyo in kale.
“Berri ama maanta oo Isniin ah ayaa lagu wadaa in lasii daayo badmaaxiinta, kaddib markii aan burcadda la yeelannay wadahadallo guuleystay,” ayuu yiri Mustafa Kamaal oo ah sakaal ka tirsan wasaaradda arrimaha dibadda ee dalka Bangaladesh.
Markabka ay la socdaan shaqaalahan ayaa waxaa la afduubay bishii Desember 05, 2010. Iyadoo 26-ka qof ee markabka la socda ay yihiin 25-rag ah iyo xaaska kabtanka markabka, iyadoo aanay jirin wax dhibaato ah oo loo geystay.
Kooxaha burcadbadeedda ah ayaa waxay afduubeen markabkan isagoo ka yimid dalka Giriigga kuna socday dalka Indonisia. Badmaaxiintan lasii daynayo ayaa imaanaysa iyadoo toddobaadkan ay sii-daayeen badmaaxiin u dhashay dalka Hindiya.
Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya