
Khamiis, 21 July 2011(HOL): Intii beryahanba la socotay ciyaaraha Kubadda Cagta iyo Kubadda Kolayga isugu jira ee ka socda garoomada Spånga IP iyo Sporthall ee magaalada Muqdisho maanta ma jirin wax ciyaaro ah oo Kubadda Cagta ah, hayeeshee waxaa jiray ciyaaro Kubadda Kolayga ah.
Garoonka Kubadda Kolayga Sporthall ayaa waxaa ka dhacay ciyaaro ka tirsan tartan uu soo qaban qaabiyay Ururka SKIF, waxaana caawa wada ciyaaray afar kooxood oo ka kala socday dalalka Ingiriiska, Sweden Canada iyo Scandinevian-ka.
Ciyaartii hore ayaa waxay dhexmartay kooxaha Stockholm (Sweden) iyo Xiddigaha Scandinevian-ka, waxayna ciyaartaas ku dhamaatay 35—11 oo ay ku adkaatay Kooxda Stockholm.
Waxaa dhacday ciyaar kale oo iyadana dhexmartay Kooxaha Toronto Stars (Canada) iyo London Stars (UK), waxayna ciyaartan oo aad u adkeyd ku soo idlaatay 49—92 oo ay ku guusha ku raacday Kooxda Toronto Stars.

Dadweyne aad u faro badan oo isugu jiray kuwo degan magaalooyinka kala duwan ee dalka Sweden iyo kuwo ka yimid Dalalka kale ee Yurub iyo Waqooyiga Ameerika ayaa garoonka Sporthall ee ay ciyaarta ka dhacday si weyn u soo camiray. Sidoo kale waxaa garoonka joogay dad Isboortiga Soomaaliya magac iyo maamuus ku leh, kuwaasi oo u soo ciyaaray kooxihii Qaranka Soomaaliya haddii ay ahaan lahayd Kubadda Kolayga iyo haddii ay ahaan lahayd Kubadda Cagta.
Tartankan oo socon doonaa ilaa 23-ka bishan ayaa wuxuu soo bilowday 19-kii bishan, wuxuuna tartankan yahay mid sanadkiiba uu mar qabto Ururka SKIF.

Dhanka kale, maalinta berri ah ayaa waxaa garoonka Spånga IP ee magaalada Stockholm ka bilaaban doona semi-finalka Koobka Ciyaaraha Xagaaga Sweden, waxaana berri wada ciyaari doona Kooxaha Leicester (UK) iyo Sonpetry (Finland).
Halkan kala soco haddii alle idmo kooxdii ku guuleysata Koobka Kubadda Cagta iyo middii kale ee ku guuleysata Koobka Kubadda Kolayga.









Salaad Iidow Xasan (Xiis), Hiiraan Online
sxiis@hiiraan.com