3/28/2024
Today from Hiiraan Online:  _
Wararka Maanta- Axad, Sept 19, 2010
Xarrakatul Shabaab iyo Xisbul Islaam oo la kala wareegtay xarumaha Idaacadaha Hornafrik iyo GBC ee Muqdisho

Axad, September 19, 2010 (HOL) − Xoogagga Islaamiyiinta ah ee kasoo horjeeda dowladda KMG ah ayaa shalay gallinkii dambe iyo xalay la kala wareegay xarumaha idaacadaha madaxa-bannaan ee Hornafrik iyo GBC (Codka Nabadda), kaddib markii ay gudaha u galeen ciidammo hubeysan.

Shaqaale diiday in lasoo xigto magacyadooda oo ka tirsan labadan idaacadood ayaa saxaafadda u sheegay in xarumihii labadan raadiye lala wareegay, laguna qasbay shaqaalihii joogay inay ka baxaan xarumahaas.

"Xalay 2:00-habeennimo, ayay ciidamo hubeysan oo ka tirsan Xarrakatul Shabaab waxay soo galeen xarunta idaacadda oo ku taalla Bakaaraha, waxayna dibadda u saareen shaqaalihii iyagoo baaritaanno bilaabay," ayuu HOL u sheegay mid ka mid ah shaqaalaha idaacadda Hornafrik.

Ilo wareedyo, ayaa xaqiijiyay in qaar ka mid ah qalabkii idaacadda Hornafrik ee Muqdisho ay ku howlgalaysay laga saaray dhismaha ay idaacaddu dagganayd, kuwaasoo la sheegay inay ka mid yihiin kaydkii wararka, lamana oga halka loo qaaday.

Radio Hornafrik, ayaa labadii maalmood ee ugu dambeeyay hawada ka maqnaa, waxaana sannadkii hore lala wareegay xarun ay ku lahaayeen magaalada Kismaayo ee xarunta gobolka Jubbada hoose oo ay maamusho Xarrakatul Shabaab.

Wariye kale oo u hadlay idaacadda GBC (Codka Nabadda) oo xaruntoodu ku taallo degmada Huriwaa ee Muqdisho ayaa sheegay in ciidamo ka tirsan ururka Xisbul Islaam ay gudaha u galeen xarunta, ayna si toos ah ula wareegeen idaacadda.

"Waxaa maalmahan socday kulammo ay mas'uuliyiin ka tirsan Xisbul Islaam kaga codsaneyeen maamulka in lagu wareejiyo, balse fashilmay, waxaana ugu dambeyn shalay gallinkii dambe ay la wareegay idaacadda," ayuu saxaafadda Muqdisho u sheegay mid ka mid ah shaqaalaha GBC.

Tallaabooyinkan, ayaa waxay daba socdaan cadaadis lagu hayay idaacadaha ka howlgala Muqdisho, kuwaasoo bishii April ee sannadkan looga joojiyay amar ahaa inauy joojiyaan baahinta muusig iyo heesaha, waxaana dhowr toddobaad ka hor lala wareegay idaacaddii Qur'aanka Kariimka ee Muqdisho.

Sidoo kale, Radio Somali-weyne ayaa isagana lagula wareegay dagaalladii ka dhacay waqooyiga Muqdisho bartamihii sannadkan, iyadoo mas'uuliyiinta idaacadaas ay sheegeen in qalabkii oo dhan la rartay.

Mas'uuliyiinta Xarrakatul Shabaab iyo Xisbul Islaam ayaan ka hadlin la wareegidda ay la wareegeen xarumaha idaacadaha madaxa-bannaan ee Hornfarik iyo GBC oo ka mid ah idaacadaha Muqdisho.

Maxmaed Xaaji Xuseen, Hiiraan Online
[email protected]
Muqdisho, Soomaaliya













Click here
9/19/2010 8:31 AM EST
Axad, September 19, 2010 (HOL) − Dowladda Soomaaliya ayaa sheegtay inay taageero dhaqaale oo malaayiin Dollar ah ka heleen dalalka Carabta, kaddib shir ka dhacay magaalada Qaahira ee xarunta dalka Masar.

9/19/2010 8:29 AM EST
Axad, September 19, 2010 (HOL) − Maamulka idaacadda iyo TV-ga Hornafirk iyo dowladda Soomaaliya ayaa cambaareeyay la wareegiddii ay Xarrakatul Shabaab la wareegtay xarunta Idaacadda ee Muqdisho, iyadoo maamulku uu sheegay inaysan joogsanayn howlaha idaacadda.

9/19/2010 8:22 AM EST
Axad, September 19, 2010 (HOL) − Dowladda Nayjeeriya ayaa Qarammada Midoobay ka codsatay inay ku taageeraan dhaqaale ay ciidammo ugu diraan dalka Soomaaliya, si ay uga mid noqdaan ciidamada AMISOM ee ku sugan Muqdisho.

9/19/2010 7:20 AM EST
Axad, September 19, 2010 (HOL) − Wasiir ku xigeenka wasaarada kuluumaysiga iyo khayraadka Puntland C/qaadir Muuse oo shir ku qabtay Garowe ayaa sheegay in maamulka uu qaadayo talaabooyin muhiim ah oo looga hortagayo Burcad Badeeda.

9/19/2010 3:14 AM EST
Axad, September 19, 2010 (HOL) − Xukuumadda dalka Yemen ayaa sheegtay inay qabatay markab watay calanka dalka Malta oo 20-haamood oo sun ku daadiyay badda cas, gaar ahaan xeebaha dalkeeda.

9/19/2010 2:53 AM EST
Axad, September 19, 2010 (HOL) − Waxaa maanta mar kale dib u dhac uu ku yimid kulankii ay xilddhibaannada baarlamaanka Soomaaliya yeelan lahaayeen, kaasoo la filayay inay ku xukuumaddu ku hortimaaddo si codka kalsoonida loogu qaado.