Ciidamada AMISOM oo xalay duqeymo sababay dhimasho iyo dhaawac ka geystay Magaalada Muqdisho

Isniin, July 12, 2010 (HOL) - Ciidamada AMISOM ee ku sugan Muqdisho ayaa xalay saqdii dhexe duqeymo sababay dhimasho iyo dhaawac u qaybtay xaafado ka tirsan degmada Dayniile, iyadoo duqeymahaas ay ahaayeen kuwo dhacay xilli aanay dagaallo socon.

Goobjoogayaal ku sugan xaafadaha la duqeeyay ayaa sheegay in madaafiic badan ay kusoo hoobteen deegaankooda ayna dileen inta la ogyahay hal qof oo rayid ah, sidoo kalena ay dhaawaceen u geysteen 4-qof oo kale.

"Duqeyn ayaa markii ay saacaddu ahayd 2:30-habeenimo ku bilaabatay xaafadaha Gubta iyo Ciise Cabdi oo ka tirsan Degmada Dayniile, dadkii ku noolaa deegaanka waxay bilaabeen inay kala cararaan, madaafiicdu waxay dileen 1-qof, waxayna dhaawaceen afar qof oo kale" ayuu yiri Goobjooge ku sugan goobaha la duqeeyay.

Madaafiicda ayaa badankood ku dhacay deegaano horay looga barkacay, waxayna cabsi weyn gelisay duqeyntu dadka rayidka ah ee ku harsanaa deegaanadaas, kuwaasoo saakay bilaabay inay isaga barakacaan.

Duqeyntan ayaa noqonaysa middii ugu khasaaraha yarayd ee ka dhacda Muqdisho, iyadoo saraakiisha AMISOM iyo kuwa Dowladda aysan weli ka haldin duqeynta, taasoo kusoo beegantay xilli qaraxyo ay ka dhaceen xalay dalka Uganda.

Saraakiisha Dowladda Uganda ayaa ku eedeeyay Qaraxyadii dalkeeda ka dhacay Xararkatul Shabaab, iyadoo sarkaal ka tisran Al-shabaab uu sheegay inay aad ugu farxeen qaraxyadaas, balse ma sheegin inay iyagu ka dambeeyeen iyo in kale.

Maxamed Xaaji Xuseen, Hiiraan Online
[email protected]
Muqdisho, Soomaaliya