Ciidammada Ammaanka Garoonka diyaaradaha Magaalada Muqdisho oo gacanta ku dhigay ruux ay sheegeen inuu watay walxo qarax sameeya

Khamiis, December 31, 2009(HOL): Ciidamada ammaanka garoonka diyaaradaha ee Muqdisho ayaa sheegay inay qabteen bishii November ee sannadkii sannadkan wiil dhallinyaro oo qorsheynayay inuu qarax u geysto mid ka mid ah diyaaradaha rakaabka qaada ee Shirkadda Daallo.

Hadal ay wakaaladaha wararka qaarkood kasoo xigteen taliyaha ammaanka garoonka diyaaradaha ee Muqdisho Axmed Cali Afdooje, Afhayenka Booliiska G/dhexe C/llaahi Xasan Bariise iyo Afhayeenka AMISOM Maj. Behuko Brigiye ayay k sheegeen in wiilkaas la qabtay uuna haatan xiran yahay.

Madaxa ammaanka garoonka diyaaradaha ayaa sheegay in wiilkan uu raaci lahaa diyaarad ka duulaysay Muqdisho oo ku socotay dalka Imaaraadka Carabta siina maraysay Hargeysa iyo dalka Jabuuti, ayna falkaas u arkeen inuu yahay mid argagaxiso.

"Falkan wuxuu u muuqaal ekaa mid argagaxiso, balse waxaa socda baaritaanno aan ku ogaanayno kooxda uu wiilkan xiriirka la leeyahay iyo qorshihiisa oo dhab ah" ayuu yiri Col. Bariise oo ay soo xiganaysay wakaaladda wararka AP.

Maj. Behuko oo ah afhayeenka AMISOM ayaa isaguna sheegay in falkan uu ahaa mid khatar ah oo laga hortagay, isagoo xusay in marka baaritaanka la dhameeyo ay soo bixi doonaan wararka xaqiiqada ah.
"Ruuxa aan qabannay wuxuu watay walax dareerto ah iyo walax kale oo budo ah, waxaana noo caddaatay inay yihiin walxo qaraxyo laga sameyn karo, balse waxaan markii hore u haysay inay tahay daawada lagu dhaqo lacago Black Dollar ah oo aan garoonka ku qabnay" ayuu yiri madaxa ammaanka garoonka Muqdisho Afdooje.

Mas'uul u hadlay Shirkadda Daallo ayaa sheegay inaysan wax badan kala socon arrintan, balse ay tahay mid cabsi weyn gelisay, sidoo kale ma jirto koox ka mid ah kooxaha hubeysan ee Somalia oo sheegatay mas'uuliyadda arrintan.

Maxamaed Xaaji Xuseen, Hiiraan Online
[email protected]
Muqdisho, Soomaaliya