2014-10-21
Today from Hiiraan Online:  _
Wararka Maanta- Khamiis, Feb 21, 2008
Idaacadda Horn Afrik oo dhowr maalmood hawada ka maqan


Khamiis, February 21, 2008(HOL): Idaacadda Horn Afrik oo ka mid ah Idaacadaha sida weyn looga dhegeysto dalka Soomaaliya gudahiisa iyo Dibaddiisa ayaa waxay hawada ka maqan tahay dhwor maalmood.

 

Warar ku dhow dhow howl-wadeennada Idaacadda ayaa waxay HOL u sheegeen in Idaacadda ay hawada uga maqan tahay sabab la xiriirta khilaaf u dhaxeeya Saamileyda Shirkadda Idaacadda Horn Afrik, kaasi oo sababay in Idaacadda la demiyo.

 

Lama yaqaano waxyaabaha uu salka ku hayo khilaafka u dhaxeeya Saamileyda Shirkadda Warbaahinta Horn Afrik, hayeeshee waxaa uu khilaafkan ku soo beegmayaa iyadoo mid ka mid ah Milkilayaashii Idaacadda oo lagu magacaabi jiray Cali Iimaan Sharma-arke uu geeriyooday, halka Milkile kale oo lagu magacaabo Axmed C/salaan Xaaji Aadan uu ka mid noqday Xukuumadda Federaalka Soomaaliya.

 

Ma ahan Idaacadda Horn Afrik oo kaliya waxa hawada ay ka saareen Saamileyda Shirkadda Horn Afrik hayeeshee waxaa iyana Hawada ka maqan TVga Horn Afrik la yiraahdo iyo Idaacadda Capital Voice oo Bah wadaag la ah Idaacadda Horn Afrik, kuwaasi oo dhamaantood densanaantooda ay dareemayaan Dad badan ku dhaqan gudaha iyo dibadda Soomaaliya.

Idaacadda Horn Afrik ayaa marka laga soo tago wararka u gaarka ah ee ay dhegeystayaasheeda u tebiso waxaa ay sidoo kale u soo gudbin jirtay Laamaha Afka Soomaaliga, Carabiga iyo Ingiriiska ee Idaacadda BBC-da, kuwaasi oo ay ka dhegeysan jireen Mowjadda Idaacadda ee ah 99.9 MHz.

 

Sidoo kalena, Idaacadda Capital Voice oo iyadana bah-wadaag la ah Idaacadda Horn Afrik ayaa waxay iyadana u soo tebin jirtay Dadka Soomaaliyeed Laanta Afka Soomaaliga ee Idaacadda Codka Mareykanka VOA, taasi oo ay ka dhegeysan jireen Mowjadda 88.8 MHz.

 

Si kastaba arrintu ha ahaatee, Idaacadda Horn Afrik oo ka mid ah Idaacadaha sida weyn looga dhegeysto gudaha dalka Soomaaliya iyo Dibaddiisa ayaa waxaa la aas-aasay 12-kii December ee sanadkii 1999-kii, iyadoo ka maqnaashaheeda hawadana haatan si weyn loo dareemayo.

 

Salaad Iidow Xasan (Xiis), Hiiraan Online

sxiis@hiiraan.com

Mogadishu, Somalia





Post your comments

2008-02-21 8:47 AM EST
Khamiis, February 21, 2008(HOL): Dagaal xooggan ayaa maanta wuxuu ka dhacay Deegaanka Suuqa Xoolaha ee Degmada Huriwaa, iyadoo dagaalkaasina uu u dhaxeeyay Ciidamada Dowladda Federaalka Soomaaliya iyo Kooxo hubeysan oo ka soo horjeeda.

2008-02-21 8:43 AM EST
Khamiis, February 21, 2008(HOL): Ciidamo ka amar qaata Dowladda Federaalka Soomaaliya ayaa maanta markii labaad waxay gudaha u galeen Suuqa Bakaaraha oo ah Suuqa ugu weyn Soomaaliya.

2008-02-21 3:21 AM EST
Khamiis, 21 February, 2008(HOL): Safiirka Dowladda Koofur Afrika u fadhiya Qaramada Midoobay Ambassador Dumisani Kumalo ayaa golaha Ammaanka ee Qaramada Midoobay ku eedeeyay in uu ka cago-jiido arrinta Soomaaliya mar kasta oo la yiraahdo ha laga hadlo.

2008-02-21 3:19 AM EST
Khamiis, 21 February, 2008(HOL): Ugaas Maxamed Weli oo ka mid ah Xubnaha Isbaheysiga Dib u xoreynta Soomaaliya ayaa ugu baaqay Ciidamada Amisom in ay muddo 25 maalmood ah uga baxaan Soomaaliya, isagoo haddii ay ka bixi waayaana sheegay in ay jab iyo halaag la kulmi doonaan.

2008-02-21 3:16 AM EST
Khamiis, 21 February, 2008(HOL): Dagaal u dhaxeeyay Ciidamada Dowladda iyo kuwa Itoobiya oo isku dhinac ah ayaa saaka ka dhacay Deegaanka Suuqa Xoolaha ee Degmada Huriwaa.

2008-02-21 3:16 AM EST
Khamiis, 21 February, 2008(HOL): Dadka ku dhaqan Degmada Waaberi ee gobolka Banaadir ayaa waxay qaati ka joogaan Rag ku labisan Dharka Ciidamada Dowladda Federaalka Soomaaliya oo habeenkii dhac u geysta.

2008-02-21 3:13 AM EST
Khamiis, 21 February, 2008(HOL): Waxaa ku sugan Magaalada Addis Ababa ee Dalka Itoobiya Ra'iisal Wasaarihii hore ee Dowladda Federaalka Soomaaliya Prof. Cali Maxamed Geeddi, kaasi oo la sheegay in uu halkaas ku tegay casuumaad uu ka helay Madaxda Dowladda Federaalka Itoobiya.