Isniin, October 29, 2007(HOL): Wararka naga soo gaaraya Magaalada Baydhabo ee Gobolka Bay ayaa waxay sheegayaan in Ra’iisal Wasaare Cali Maxamed Geeddi oo saacado ka hor dib ugu laabtay Baydhabo uu baarlamaanka Soomaaliya hortiisa uga dhawaaqay in uu iska casilay Xilkii Ra’iisal Wasaarenimo ee Soomaaliya.

Prof. Cali Maxamed Geeddi ayaa is-casilaaddiisa ku dhawaaqay kadib markii uu kulan la yeeshay Madaxweyne C/llaahi Yuusuf kadibna uu u gudbiyay go'aankiisa is-casilaadda ah, iyadoo dabadeedna uu madaxweynaha go'aankaas ka aqbalay.

Xildhibaan Prof. Cali Maxamed Geeddi oo hadal ka jeediyay Xarunta Baarlamaanka Soomaaliya ayaa wuxuu sheegay in uu iska casilay xilkii Ra’iisal Wasaarenimo ee Soomaaliya, isagoo Mudanayaasha Baarlamaankana u sheegay in uusan ka tegin isla markaana uu weli yahay Xildhibaan ka tirsan Baarlamaanka Soomaaliya.

“Maanta Waxaan rabaa Dhaqan cusub in aan u bilaabo Baarlamaanka Soomaaliya, waxaana u tanaasulayaa Danta Dalka iyo Dadka aniga oo ka degaya Xilka Ra'iisal Wasaarenimada Soomaaliya”ayuu yiri Ra’iisal Wasaare Maxamed Geeddi oo sheegay in intii ay jirtay Xukuumaddiisa ay howl badan qabatay, howl badanna ay u harsaneyd.

Prof. Cali Maxamed Geeddi waxaa uu mahadcelin u jeediyay Shacabka Soomaaliyeed, gaar ahaan kuwa ku dhaqan Gobolka Bay oo uu sheegay in ay taageero hagar la’aaneed siiyeen Dowladda Federaalka Soomaaliya, sidoo kalena wuxuu u mahadceliyay Dowladaha saaxibka la ah Dowladda Federaalka Soomaaliya iyo guud ahaan Beesha Caalamka oo taageero siiyay Dowladda Federaalka, kuwaasi oo uu ka rajeeyay in ay sii wadi doonaan kaalmada ay siiyaan Soomaaliya.

Intaas kadib waxaa hadlay Guddoomiyaha Baarlamaanka Soomaaliya Shiikh Aadan Maxamed Nuur (Shiikh Aadan Madoobe) oo sheegay in uu Ra’iisal Wasaare Cali Maxamed Geeddi qaatay go’aan geesinimo leh oo Dimoqraadi ah, kaasi oo loo baahan yahay in ay xubnaha Dowladda Federaalka ay ku dhaqmaan mar kasta oo ay dhinaca sharciga isku qabtaan.

Madaxweyne C/llaahi Yuusuf Axmed oo isna ka qeybgalay kulankii Baarlamaanka ayaa wuxuu Baarlamaanka Soomaaliya hortiisa kaga dhawaaqay inuu aqbalay Is-casilaaddii uu u gudbiyay Ra’iisal Wasaare Cali Maxamed Geeddi kadib markii sida uu yiri uu qiimeeyay xaaladda uu dalka ku sugan yahay iyo go’aanka is-casilaadda ah ee uu Ra’iisal Wasaaraha u gudbiyay.

Madaxweyne Yuusuf waxaa uu Xildhibaannada Baarlamaanka Soomaaliya ugu baaqay in la iska cafiyo oo xalay-dhalay laga noqdo wixii muran ahaa ee dhexmaray, isagoo Baarlamaanka hortiisa ka weydiiyay Xildhibaano taageersanaa Ra’iisal Wasaare Geeddi “Maxamed Qanyare Afrax meeye, Muuse meeye, Cumar Jees meeye, C/llaahi Shiikh Ismaaciil Meeye, Cusmaan Caato meeye” ayuu yiri Madaxweyne Yuusuf.

Madaxweyne C/llaahi Yuusf Axmed waxaa uu sheegay in xubnihii la shaqeynayay Ra’iisal Wasaare Cali Maxamed Geeddi ay sidooda uga tirsanaanayaan Dowladda, sidoo kalena ay Ciidamadiisii iyo weliba howl-wadeenadii la shaqeynayay ay intaba ka tirsanaanayaan Dowladda.

“Ra’iisal Wasaare Cali Maxamed Geeddi wuxuu ahaa Ra’iisal Wasaare Soomaaliyeed, seddex sano ayuu soo shaqeeyay, Howl badanna waa soo qabtay marka sharafkaas ayuu huwan yahay, wuxuuna leeyahay xuquuq ah in ammaankiisa la sugo”ayuu yiri Madaxweyne C/llaahi Yuusuf oo sheegay in ay howsha Xukuumadda sii wadayaan Xubno ka mid ah Golihii Wasiirrada Ra’iisal Wasaare Cali Maxamed Geeddi.

Madaxweyne C/llaahi Yuusuf Axmed waxaa uu intaas kadib sheegay in uu gelayo la-tashiyo ku saabsan Ra’iisal Wasaaraha uu soo Magacaabayo, isagoo Mudanayaasha Baarlamaankana ka codsaday in ay ula yimaadaan wixii talo ah ee ay hayaan.

Si kastaba arrintu ha ahaatee, Ra’iisal Wasaare Cali Maxamed Geeddi ayaa booqasho dhowr maalmood qaadatay waxaa uu ku tegay Magaalada Addis Ababa ee Dalka Itoobiya, halkaasi oo uu kulamo kula soo qaatay Diblumaasiyiin Mareykan iyo Reer Yurub ah iyo weliba Madaxda Dowladda Itoobiya, kuwaasi oo ay ka wada hadleen Xaaladda Dalka Soomaaliya guud ahaan iyo gaar ahaan Khilaafka soo kala dhexgalay madaxda sare ee Dowladda Federaalka, kuwaasi oo aan la ogeyn in ay lug ku leeyihiin go’aanka is-casilaadda ah ee uu qaatay.

Salaad Iidow Xasan (Xiis), Hiiraan Online
[email protected]
Mogadishu, Somalia