Guddoomiyaha Guddiga Fulinta Maxkamadaha oo ugu baaqay Shacabka Soomaaliyeed in ay la jihaadaan Ciidamada Itoobiya

Jimco, July 21, 2006 (HOL): Guddoomiyaha Guddiga Fulinta Maxkamdaha Islaamka Shiikh Shariif Shiikh Axmed ayaa ugu baaqay Shacabka Soomaaliyeed in ay la jihaadaan Ciidamada Itoobiya ee soo galay gudaha Soomaaliya, isla markaana ay ka difaacaan cadaw ku soo duulay.

Shiikh Shariif waxaa uu sheegay in ciddii aan ka qeyb qaadan jihaadkaas loo aqoonsan doono in ay tahay Khaa'inul Wadan aan dalkiisa daacad u ahayn, wuxuuna carrabka ku dhuftay in ay warbixinno ku heleen in ciidamo Itoobiya oo wata gaadiid dagaal oo aad u tiro badan ay soo galeen Soomaaliya, isla markaana ay isku xiran yihiin min Gedo ilaa Mudug

Shiikh Shariif Shiikh Axmed waxaa uu sheegay in jihaadkaas uu dhici doono haddii Dowladda Itoobiya ay Ciidamadeeda kala bixi weyso gudaha Soomaaliya, isla markaana ay dhowri weyso deris wanaaga.

Dhanka kalena, Guddoomiyaha Guddiga Fulinta Maxkamadaha Shiikh Shariif waxaa uu dadka reer Puntland uga ashtakooday madaxweyne C/llaahi Yuusuf Axmed oo uu sheegay in dhibaato ku soo wado Shacabka Soomaaliyeed, �C/llaahi Yuusuf yaa ku heysta Madaxweynenimadiisa, muddo 30 sano ah ayuu Madaxweynenimo u halgamayay, wuu helay, haku intifaaco, Umaddana dhibka haka daayo�ayuu yiri Shiikh Shariif.

Ugaasyada Beelaha Xawaadle iyo Murusade oo heshiisyo colaad joojin ah kala saxiixday

Jimco, July 21, 2006 (HOL): Ugaas C/raxmaan Ugaas Khaliif iyo Ugaas C/qaadir Ugaas xaashi (Fara-cadde) ayaa kala saxiixday Heshiis dhawaan ay ku gaareen deegaanka Maxaas Beelaha Xawaadle iyo Murusade oo bartimihii sanadkan dagaal ku dhax maray Deegaano ka tirsan gobalada Gal-gaduud iyo Hiiraan.

Heshiiska oo ay ka soo shaqeeyeen waxgarad iyo odayaal ka soo jeeda labada dhinac Islamarkaana hordhaciisa lagu qabtay magaalada B/weyn, ayay labada Ugaas si buuxda Qalinka ugu wadda duugeen heshiis kama dambeys ah oo laga gaaray Colaaddii labada dhinac,

Labada Ugaas oo intii ay socdeen kulamada Deegaanka Maxaas aan inta badan goob joog ka aheyn ayaa ugu dambeytii isla arkay Qodobada lagu heshiiyay, kaasoo ay si weyn u soo dhaweeyeen.

Intii ay socdeen kulamada ayay labada dhinac si weyn iskula lafa-gureen wax-yabihii dhaliyay dagaaladii u dambeeyay, iyadoo meel layska dhigayo khilaafkii u dhaxeeyay labada Beelood wixii ka horeeyay Dagaalkii u dambeeyay ee dhacay, waxaana xusid mudan in si fudud labada dhinac uga gudbeen arimo marka dhan laga eego culeyskooda lahaa.

Qodobada laga wada hadlay isla markaana heshiiska laga gaaray ayaa waxaa ugu muhiimsanaa, Deegaanka, Isku Celinta hantidii la kala dhacay xiligii dagaalka, iyo waliba Magta dadkii ku geeriyooday dagaaladii dhacay oo si laysla wadda qaatay looga gudbay.

Labada Ugaas oo saxiixa Heshiiska kadib Hadallo kooban jeediyay ayaa waxaa ay ku wargeliyeen labada Garab in la dhowro qodobada laysku af-garatay layskana ilaawo waxyaabihii horay u dhacay, gaar ahaan waxaa ay si weyn ula dardaarmeen dadka Reer Miyiga ah oo inta badan lagu tilmaamo in ay yihiin kuwa soo kiciya Colaadda Beelaha.

Hay'adda Cilmi Baarista iyo wadda Tashiga Soomaaliyeed CDR xafiiskeeda Gobolka Hiiraan oo si weyn ugu lug laheyd sidii Colaadda loo dhameyn lahaa ayaa madaxeeda Ing. Max'med Xasan Kulmiye waxaa uu Hiiraan Online u sheegay in dhinacyada ka qeyb-galay kulanka ahaayeen kuwo waxyaabo badan tanaasulaad ka sameynaya, gaar ahaan waxaa farta ku fiiqay Waxgaradkii kulamada ka qeyb-qaatay oo ku tilmaamay in ay u muqdeen kuwo daacad ka heshiis buuxa oo la gaaro.

Ing. Kulmiye waxaa uu intaas ku daray in lagama maarmaan ay tahay in mar walba laga doorto colaad aan dhamaad laheyn in ugu yaraan la gaaro is af-garad, waxaana uu intaas ku daray in Hay'adda CRD ay diyaar u tahay ka qeyb-galka wax kasta oo keeni kara nabad la gaaro.

Q/Midoobay oo ugu baaqday Dowladda Federaalka iyo Maxkamadaha Islaamka in ay tixgeliyaan Heshiiska Colaad joojinta ah ee ay gaareen

Jimco, July 21, 2006(HOL): Warbixin uu Magaalada Nairobi ka soo saaray Wakiilka Xoghayaha guud ee Qaramada Midoobay ee u qaabilsan arrimaha Soomaaliya Danjire Francois Lonseny Fall ayaa loogu baaqay Dhinacyada Dowladda Federaalka Soomaaliyeed iyo maxkamadaha Islaamka in ay txigeliyaan heshiiskii Colaad joojinta ee ay ku gaareen Magaaalada Khartoum.

Danjire Fall waxaa uu ugu baaqay labada dhinac in ay maleeshiyooyinkooda xakameeyaan, isla markaana ay dib u sii amba qaadaan wada hadalladii uga furmay Magaalada Khartoum ee dalka Suudaan 22-ka bishii June ee aynu ka soo gudubnay.

Danjiraha wuxuu sheegay in hoggaanka Dowladda Federaalka iyo wakiillada Maxkamadaha Islaamka ay sameeyeen bilow wanaagsan markii ay bishii hore ku kulmeen Magaalada Khartoum, wuxuuna labada dhinacba ugu baaqay in ay joojiyaan wax kasta oo keeni kara in ay iska hor imaadyo dhexmaraan.

Fall waxaa uu sheegay in haddii aan nabadgelyo laga helin dalka Soomaaliya ay adkaan doonto in gargaar ay u baahan yihiin lala gaaro dad badan oo ku tabaaleysan gudaha Soomaaliya

Hadalkan Ambassador Fall ayaa wuxuu ku soo beegmayaa kadib markii ciidamo ka socda Dowladda Itoobiya ay gudaha u galeen Dalka Soomaaliya, iyadoo taasina ay keentay in ay Maxkamadaha Islaamka ku hanjabaan in ay la dagaalami doonaan Ciidamada Itoobiyaanka ee soo galay dalka Soomaaliya.