Jimco Oktoobar 28, Ottawa, Canada - (HOL) - Guddoomiyaha Gobolka Ontario ee Dalkan Canada Mudane Dalton McGuinty uu wehiyo Walaalkii X/dhibaan Daivid McGuinty oo ah mudane ka tirsan Baarlamaanka  Dowladda  Federalka  Canada ayaa Masaajida Al-Huda waxay kula  AFUREEN qaar ka mid ah Jaaliyadda Soomaaliyeed ee magaalada Ottawa.

Waxaa Mudane McGuinty halkaas ku soo dhaweeyey ku simaha Imaamka Masaajika Suleyman Cismaan Xirsi  iyo odayaal ka tirsan jaaliyada Soomaaliyeed. Waxaa halkaas khudbad soo dhaweyn ah ka jeediyey Abdulhakim Sheikh Maxamed Rashaad  oo warbixin kooban ka siiyey qorshaha Masjidka cusub ee MASJIDU ASALAAM oo dhawaan laga Furidoono koofurta magaalada Ottawa.

Ka dib waxaa hadalkii la wareegey  Mudane Dalton McGuinty oo  halkaas  kula hadlay jaaliyadii Soomaaliyeed. Mudane McGuinty waxaa uu ka waramay muhimadda ay leedahay isku xirnaashaha iyo jaceyka qoyska isaga oo misaal u soo qaatay qoyska uu ka dhashay oo  ka koobnaa 12 qofood. "Waaya aragnimo wanaagsan ayaan ka helay nolosha qoyskeyga taas oo ii sahashay maamulidda 12ka Malyuun ee ku nool gobolkan Ontario" ayuu yiri Mudane. McGuinty.

Mudane  McGuinty wuxuu tacsi gaara u diray Muslimiinta isaga oo uga tacsiyadeynayo dhul gariirkii ka dhacay dalka Baskistaan oo ay ku dhinteen dad ka badan 80,000 (Sideetan kun) oo qofood.

Daauud  Aden oo ka mid ah ardayda  wax ka barata Jaamacadda Carleton Univeristy ee magaalada Ottawa ayaa ka codsaday Mudane McGuinty in dowladda uu madaxda ka yahay wax ka qabato qiimaha lagu dhigto jaamacadaha  Ontario oo sii khordhaya maaliba maalinta ka dambeysa. Waxaa sidoo kale halkaas su’aalo ka kala weydiiyey Guddoomiyaha  Amino Mohamed  iyo Sahra Macalim Dahir oo ka codsaday in dowladda Ontario kaalmeyso ganacsatada yar yare e gobolka.

Ugu dambeyntii Guddoomiyaha Gobolka Ontario wuxuu soo dhaweeyey furitaanka Masaajidka Cusub oo ay jaaliyadda Soomaaliyeed ka hirgalisay magaalada Ottawa. Masaajikaas oo loogu magac daray (MASJID ASSALAAM) oo ay iibsadeen jaaliyadda Soomaaliyeed ee Ottawa. Wuxuu Mudane McGuinty ballanqaaday in uu Masaajidka la shaqeyndoono wixii kaalmo ahna ku taageeridoono.

Waxaa sidoo kale jaaliyadda Soomaaliyeed  isna la hadlay Mudane David McGuinty oo ballanqaaday in uu la shaqeyndoono jaaliyadda Soomaaliyeed ee Ottawa.

Labadaan Mudane oo wada dhashay ayaa waxaa laga soo doortaa koofurta Ottawa oo ah deegaan ay Soomaalidu ku badan tahay.

Wixii faahfaahin ah, fadlan kala xiriira telefoonada kala ah:

(613) 244-0331
(613) 884-7490

Ottawanews@hiiraan.com
Hiiraan Online